iklan

DESPORTU, BOBONARO, HEADLINE, MUNISÍPIU

Desportu komunitária iha Bobonaro, golu úniku Jay Soares lori Oe-Leu A hakat ba finál

Desportu komunitária iha Bobonaro, golu úniku Jay Soares lori Oe-Leu A hakat ba finál

Klubu rua halo hela kontra no atake iha kampu futeból Cavalaria 5, postu administrativu Bobonaro, Oe-leu A uza farda azúl, Oe-leu B uza farda malahuk. Imajen Tatoli/Sérgio da Cruz.

BOBONARO, 26 novembru 2022 (TATOLI)-Golu úniku hosi jogadór avansadau, Jay Soares (93), sábadu ne’e iha kampu futeból Calaria 5, susesu Lori klubu Oe-Leu (A) jakat ba faze finál kompetisaun jogu komunitária époka 2022 iha postu administrativu Bobonaro, hodi komemora loron proklamasaun independénsia 28 novembru ba dala-47.

Molok hahú jogu ne’e, treinadór klubu rua hamutuk ho komisaun organizadora koordena ho árbitru deside jogu ne’e hala’o durante menutu 40 de’it, komposta hosi parte dahuluk menutu 20 no parte daruak menutu 20, tanba kondisaun kampu udan halo tahu no bee nakonu nune’e la permite jogu tuir oras normál menutu 90.

Iha menutu primeiru, ekipa rua mai hosi Suku ida de’it ne’e lansa kedas kontra atake ba malu, jogu modelu ofensiva hotu tanba iha ambisaun hakarak tama ba finál.

Jogu kontinua ekipa rua nafatin fó prensaun ba malu, maske kampu laran tahu dodok loos, maibé ho kondisaun ne’e halo ekipa Oe-Leu (A) forte liu tanba jogu foin la’o menutu lima, avansadu Jay Soares susesu fera ulu hodi muda rezultadu ba 1-0.

Jogu kontinua la’o iha menuu neen ba leten, ambiente kampu dodok liután, tanba Oe-Leu (B) mós hakarak responde golu ida maibé ís la to’o jogu remata ho rezultadu 1.0.

Tama ba segunda parte ka parte daruak, kampu laran nakonu liu ona ho bee halo jogador hosi ekipa rua na’e laiha ona vontade atu hatudu tátika individuál no duni bola atu hatama goju.

Jogu kontinua la’o to’o menute 38 ba leten ritmu jogu hosi ekipa rua ne’e mantein ho nune’e to’o arbitru deside hakotu jogu iha menutu 40 bazea ba konkordánsia.

Ho rezultadu ne’e fó vitória ba Oe-Leu (A) no Oe-Leu (B) tenke simu konsekuénsia derrota hodi hadau fali terseiru lugar.

Enkuantu jogu tuir mai, suku Sibuni sei kontra Marobo, suku Atuaben. Hosi jogu ne’e entre klubu rua ne’e ida manán sei kontra Amandes hosi suku Bobonaro vila atu hadau malu hakat ba finál kontra Oe-Leu (A), no klubu ne’ebé lakon sei kontra Oe-Leu (B) hadau terseiru lugár.

Treinadór Klubu Oe-eleu (A), Vitorino Gusmão, sente kontente ho jogu ne’ebé nia ekipa hatudu, maske vitória ho golu úniku de’it tanba situasaun klima mak la permite.

“Ami nafatin preparadu atu hasoru sé de’it, tanba hau fiar ha’u+nia jogadór sira sei esforsu maka’as, ami mós konsege hatún suku barak ona, ne’ebé ha’u otimista katak ami sei sai kampiaun jogu komunitária tinan ida-ne’e iha postu Bobonaro, tanba ami Oe-leu Iha mentalidade joga to’o ona nível munisipiu,” Vitorino hateten ba Jornalista Tatoli hafoin jogu semi-finál ne’e.

Enkuantu árbitru sira-ne’ebé lidera jogu ne’e mai hosi Asosiasaun Futeból Bobonaro (AFB), komposta hosi árbitru Domingos Soares ‘Juragan’, asistente primeiru Lucas Felix no asistente daruak ‘Anau’.

Enkuantu kompetisaun desportu Komunitária ne’e hetan apoia hosi Sekretaria Estadu Juventude no Desportu (SEJD) ho montante orsamentu $2.000-resin hodi realiza mós kompetisaun voleiból feto no mane, maratona, halai karon, dada-tali no seluk tán.

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!