iklan

NASIONÁL, EDUKASAUN, HEADLINE, MUNISÍPIU, VIQUEQUE

Ensinu pre-eskolár Dara-Loi Uatolari gradua estudante na’in-48

Ensinu pre-eskolár Dara-Loi Uatolari gradua estudante na’in-48

VIQUEQUE, 26 novembru 2022 (TATOLI)-Ensinu pre-eskolár Dara-Loi, suku Matahoi, postu adiministrativu Uatolari, munisípiu Viqueque, sábadu ne’e, realiza serimónia graduasaun inisiál ba estudante na’in-48 tanba finaliza ona estudu iha nível pre-eskolár.

Reprezentante servisu edukasaun munisípiu Viqueque, Bernardo Fereira, haktuir prosesu ensinu pre-eskolár hahú idade neen to’o ualu eskola obrigatóriu no gratuita, atu tama primeiru siklu kooperasaun Governu hamutuk ho inan amán sira hodi prepara oan sira kuda modalidade molok sira hakat ba primeiru siklu.

“Ensinu pre-eskolár Governu nia parte oinsá nomeia fromadór no kria kondisaun. maibé pre-eskolár Dara-Loi foin halo konstrusaun edifísiu eskolár. Ohin realiza gradua inisiál ba estudante sira, bainhira gradua inísiu ida-ne’e ita-boot sira tenke kontinua ba primeiru siklu”, Bernardo Fernandes, hateten ba jornalista sira, hafoin gradua ba estudante pre-eskolár, iha eskola pre-eskolár Dara-Loi, sábadu ne’e.

Nia dehan, pre-eskolár la’ós hosi parte Governu de’it, maibé hetan apoia hosi parseiru sira hanesan UNICEF, Fundasaun Alola, UNESCO no sosiedade sivil sira iha Timor-Leste.

“Ha’u agradese ba UNICEF, Fundasaun Alola, UNESCO no sosiedade sivil sira ne’ebé fó apoia ba diresaun edukasaun, limitasaun sira-ne’ebé ita hasoru agora, ha’u hanoin ba oin la’ós hanesan ne’e nafatin,” nia katak.

Nia enkoraja estudante pre-eskolár ne’ebé gradua ona atu prepara-aan nafatin hodi kontinua estudu hodi haboot koñesimentu iha primeiru siklu nune’e bele hetan gradua iha ensinu superiór sira iha Timor Leste.

“Ha’u husu mós ba inan amán sira hodi tau matan ba oan sira nian eskola ho di’ak. Atu labele ramata iha dalan, maibé lori sira atinje sira-nia objetivu finál”, nia realsa.

Koordenadora pre-eskolár, Ester da Silva, hateten graduasaun ne’e realiza ba dala-6 ne’e estudante hamutuk 48 no totál estudante pre-eskolár hamutuk na’in-80, hosi klase A totál hamutuk na’in-20 no klase B na’in-60.

“Ami fó graduasaun ne’e loloos 50, maibé na’in rua maka la tuir graduasaun nune’e estudante ne’ebé gradua hamutuk na’in-48. Estudante sira-ne’ebé seidauk simu gradua ami sei kontinua hanorin hodi tinan 2023, atu sira bele gradua tán,” nia hateten.

Iha serimónia graduasaun ne’e, estudante no profesór pre-eskolár aprezenta graduante sira lénlivru hodi hatudu estudante sira-nia koñesimentu ne’ebé durante ne’e aprende iha pre-eskolár.

Jornalista: Vitorino Lopes da Costa
Editóra: Evaristo Soares Martins

iklan
iklan

Leave a Reply

iklan
error: Content is protected !!