iklan

NASIONÁL, EKONOMIA, DILI, HEADLINE, POLÍTIKA

Komunidade Camea preokupa kualidade cesta bázika

Komunidade Camea preokupa kualidade cesta bázika

Distribuisaun Cesta Bázika ne'ebé kompañia atu distribui iha suku Cameia, postu administrativu Cristo Reí, munisípiu Dili. Imajen Tatoli/Nelia Fernandes.

DILI, 26 novembru 2022 (TATOLI)- Xefe suku Camea, postu administrativu Cristo Reí, Matos da Costa, informa komunidade iha suku refere preokupa ho distribuisaun cesta bázika ba kada uma-kain tanba laiha kualidade.

“Iha prosesu fahe, sasán balun maka ita-nia komunidade balun husu atu troka, hanesan sasán fohuk, hudi no abakate balun dodok no mós modo tahan sira presiza troka, kompañia prontu troka. Ita-nia komunidade balun mós lamenta kona-ba na’an nia tarjetu la to’o, tanba Governu fó 800 grama, maibé sira fó 500 grama de’it, entaun sira ko’a tiha 300 grama,” Matos da Costa, hateten ba Tatoli iha Sede Suku Camea, sabádu ne’e.

Nia hatutan, iha lamentasaun seluk komunidade sira hato’o, kona-ba ijiéne tanba produtu distribuisaun cesta bázika empreza la tau iha fatin ne’ebé aas, maibé tau de’it iha rai.

“Sistema atendimentu hosi kompañia ne’e maka dala ruma ita haree ladún di’ak, tanba sasán ne’ebé ema simu, ita ko’alia kona-ba ijiene, buat-ne’ebé saúde nian ita tenke tau iha fatin ne’ebé aas, tanba sasán sira (empreza) tau de’it iha rai ne’e mós presiza hadia,” nia fó hanoin.

Kona-ba presu produtu, nia katak komunidade balun hatene hela nia presu, maibé laiha protestu.

“Ha’u hanoin komunidade balun hatene hela ninia presu, maibé atu reklama direta ba iha kompañia ne’e laiha, maibé sira-nia lamentasaun ba liu mak iha kualidade sasán, presu ne’e sira ladún komprende,” nia dehan.

Iha suku cameia aldeia hamutuk 13, maibé kompañia Hillunorevol Unipessoal LDA distribui ba aldeia 10 de’it, tanba aldeia tolu (3) seluk to’o loron ohin seida’uk iha informasaun kona-ba kompañia manán-na’in.

“Entaun empreza Hillunorevol Unipessoal LDA fahe cesta bázika hamutuk 15.260 cabeças ba aldeia 10, hanesan aldeia ne’ebé simu ona mak Lases, Terminál no horisehik fahe tán ba aldeia Boborlau ho Bedois, depois tuir mai mak fahe tan ba aldeia Fatuk Francisco, Kaisabe, Namalai, Lenuk-hun. Maibé, aldeia tolu (3) seluk ne’ebé seida’uk tama iha kontratu kompañia ba distribuisaun mak aldeia, Ailok-laran, Aidak Behare ho Ailele-hun,” nia afirma.

Hatán ba preokupasaun ligadu ho kualidade produtu distribuisaun cesta bázika, Diretór Kompañia Hillunorevol Unipessoal Lda, Alarico Belo, hateten bainhira empreza hahú distribuisaun ba aldeia rua, hanesan Lases no Terminál empreza ne’e oho karau iha fatin distribuisaun no durante iha prosesu distribuisaun laiha ema ida mak halo lamentasaun.

“Nune’e, iha momentu kuandu hahú, ita ko’alia ba komunidade katak, ba sé de’it maka sente lamentasaun ho distribuisaun no produtu hirak-ne’ebé simu, nia bele fó reklamasaun iha fatin kedas ha’u bele troka iha ne’e no produtu hotu ne’ebé ita fó produtu ijiene ne’ebé hetan inspesaun hosi Autoridade Inspetór sira, ha’u hanoin AIFESA mós ba halo inspesaun no KAK halo inspesaun,” nia esplika.

“Ita mós ko’alia kona-ba polítika Oitavu Governu nian ba implementasaun cesta bázika, kompañia nia oportunidade mak ne’e oinsá distribui produtu ho kualidade di’ak no ijiene. Entaun, ami fahe ona cesta bázika kuaze 2.000-resin, maibé ha’u seidauk haree ema ida mai ko’alia ho ha’u kona-ba lamentasaun, tanba ne’e ha’u atu justifika katak produtu hotu ne’ebé ami tau ita-boot sira haree ho matan, ida-ne’ebé ladi’ak ita-bo’ot sira bele ko’alia iha fatin, ha’u bele troka, maibé kuandu ba to’o ona iha uma, ha’u labele troka,” Diretór ne’e fundamenta.

Maibé, kona-ba kooperasaun serbisu no boa implementasaun empreza fó oportunidade ba xefe suku no xefe aldeia sira mak sai na’in ba implementadór.

“Signifika kualkérr dadus ne’ebé sira atu fó mai ita, tenke iha dadus fatu mai hosi ministériu, hanesan reklamasaun agora barak liu. Ha’u hanoin aldeia ida-ne’e reklamasaun kuaze 3.000-resin, maibé kompañia labele fó 3.000 ne’e kedas, tanba laiha sertifikasaun implementasaun ba 3.000-resin, signifika ita iha 16.000 populasaun ba implementasaun ida ne’e, nia reklamante aas liu. Tanba, ami simu de’it kontratu hamutuk 15.000,” nia katak.

Nia akresenta, iha distribuisaun cesta bázika, Kompañia Hillunorevol Unipessoal LDA mak halo distribuisaun ba suku rua (2) hanesan, suku Cameia no Kuluhun no iha suku Camea empreza sei halo distribuisaun produtu cesta bázika ba ema-na’in 10,669.

“Iha suku Cameia faze dahuluk ita sei fahe ba 4.114, ne’e hosi aldeia haat (4), hanesan aldeia Bedois, bBuburlau, Kaisabe ho Fatuk Francisco,” nia akresenta.

Dadus item ne’ebé Tatoli asesu katak, Empreza Hillunorevol Unipessoal Lda, sei fahe distribuisaun cesta bázika ba komunidade suku Camea hamutuk item 18, hanesan fós mutin ho kilograma 6, feruk roupa kilograma 1, batar dulas kilograma 1, ikan maran 0,5 kilograma, na’an karau isin 800 grama.

Nune’e nós na’an karau ruin 1100 grama, manu broiler Pcs 1, manu tolun Pcs 6, koto mean/mutin kilograma 1, fore mungu kilograma 1, señora/repollu/brinjela set 1, lis mean/mutin 1/2 kilograma, masin Pc 1, mina litru 1, masin-midar kilograma 1.

Kafé 1/2 kilograma, hudi/ai-dila/sabraka set 1, sabonete Pc 3, detergen liquidu grama 900 no detergen kilograma 1.

Jornalista: Nelia Fernandes
Editór: Evaristo Soares Martins

iklan
iklan

Leave a Reply

iklan
error: Content is protected !!