iklan

HEADLINE, LIFESTYLE, MUNISÍPIU, OÉ-CUSSE (RAEOA)

Ministru Francisco Jerónimo apresia ho kultura tara selendang iha RAEOA

Ministru Francisco Jerónimo apresia ho kultura tara selendang iha RAEOA

Kultura Oé-Cusse tara selendang sai ezemplu ba Governu Sentrál tufuturu bele implementa. Imajen Tatoli/ Abílio Elo Nini.

OÉ-CUSSE, 26 novembru 2022 (TATOLI) – Ministru ba Asuntu Parlamentár no Komunikasaun Sosiál (MAPKomS), Francisco Martins Jerónimo, apresia ho kultura tara selendang ne’ebé adota iha Rejiaun Administrativa Espesiál Oé-Cusse Ambeno (RAEOA) tanba bele sai referénsia ba munisípiu seluk iha territóriu nasionál.

“Ami apresia tebes tanba RAEOA bele prezerva ona ninia kultura, liuliu kada loron tenke tara tais selendang iha kakorok, ida-ne’e hanesan misaun ida, atu hatudu diferente katak Atoni Oé-Cusse mak ne’e, ida-ne’e mós sai ezemplu di’ak ba iha nasionál, katak loron ida ita hot-hotu sei kontinua atu hatutan saida mak ita-nia be’i-ala sira rai hela, liuliu relasaun ho kultura,” Ministru Francisco Martins Jerónimo, ko’alia ida-ne’e, bainhira abertura karavana kulturál iha Oé-Cusse, sábadu ne’e.

Governante ne’e hato’o parabéns ba Autoridade RAEOA, tanba iha Timor-Leste só Oé-Cusse mak hahú ona atu promove tradisaun kulturál kada loron iha fatin públiku liuhosi hatais tais no tara-selendang.

“Ha’u hanoin ami hosi Governu Sentrál, inisiátiva sira-ne’e ita tenke mós implementa ba territóriu nasionál, tanba saida? Ita-nia kultura tenke promove beibeik, nune’e ita sira jerasaun foun mai, labele haluha, tanba ne’e hanesan ita-nia rikusoin dezde tempu uluk liu,” nia orgullu.

Sentimentu ksolok ne’e hato’o mós hosi Adjunta Prezidente Autoridade RAEOA, ba Asuntu Institusionál, Leonia da Costa Monteiro, katak, daudaun ne’e Autoridade RAEOA iha ona polítika ba futuru, sei uniformiza suku 18 idak-idak iha rasik kulturál.

“Iha fulan setembru foin daudaun ne’e, Autoridade mós partisipa iha komemorasaun aniversáriu Kefamenanu, ita iha ona referénsia hosi sorin, katak komunidade sira kada suku sei iha rasik nia kultura hatais no hahán tradisionál, ida-ne’e ita planeia ona iha futuru ita sei halo, para suku hotu-hotu iha rasik nia kultura lahanesan ho suku sira seluk,” nia katak.

Jornalista :Abílio Elo Nini
Editór : Evaristo Soares Martins

iklan
iklan

Leave a Reply

iklan
error: Content is protected !!