OÉ-CUSSE, 26 novembru 2022 (TATOLI) – Populasaun sira mai hosi suku 18 no sub-rejiaun haat; Pante Makasar, Oésilo Pássabe no Nítibe iha Rejiaun Administrativa Espesiál Oé-Cusse Ambeno (RAEOA), sábadu ne’e realiza karavana promove tradisaun kulturál nu’udar identidade Oé-Cusse nian hodi komemora loron proklamasaun Independénsia 28 novembru 2022.
Karavana kulturál ne’e, objetivu atu enkoraja komunidade sira, liuliu jerasaun foun atu kontinua promove no prezerva kulturál sira-ne’ebé be’i-ala sira rai hela, atu dezenvolve nu’udar rikusoin Timor-Leste nian. Mak hanesan, primeiru atu promove produtu lokál mai hosi suku 18, daruak atu promove kultura hatais nian, terseiru atu hatudu karaterístika nu’udar Oé-Cusse.
Karavana kulturál ne’e ne’e abertura hosi Ministru ba Asuntu Parlamentár no Komunikasaun Sosiál (MAPKomS), Fransisco Martins Jerónimo, hodi kongratula Autoridade RAEOA tanba ho inisiativa di’ak mobiliza komunidade Oé-Cusse Ambeno atu promove kultura Oé-Cusse nian nu’udar identidade rasik.
“Taán ne’e Governu Sentrál fó apoiu tomak ba eventu sira-ne’e, liuliu iha área kulturál, atu nune’e bele promove kultura ne’e ba iha nível rejionál no mós nível nasionál ikus mai iha nível internasionál, tanba ohin loron tais mós rejista ona iha nível internasionál hanesan patrimóniu kulturál Timor-Leste,” Fransisco Jerónimo, ko’alia iha abertura karavana kulturál ne’e.
Governante ne’e orgullu, tanba kemomora loron proklamasaun independénsia 28 novembru, ho atividade ne’e, suku hotu-hotu iha Oé-Cusse hatudu idak-idak nia identidade kulturál kada suku nian, tanba mundu ohin loron asuntu kulturál sai tópiku importante, ida-ne’e maka sai dalan hodi konvense ema, liuliu turista sira atubele mai vizita ita-nia rai.
Adjunta Prezidente Autoridade RAEOA, ba Asuntu Institusionál, Leonia da Costa Monteiro, agradese ba Governu Sentrál tanba tinan ne’e deside mai hamutuk ho povo Oé-Cusse atu komemora 28 novembru 2022 da dala-47.
“Ohin ita hamutuk iha ne’e ho ita-nia hatais kulturál ne’e, ita kontente tebes tanba iha tinan ne’e ita hamutuk ho bainaka espesiál hosi Governu Sentrál, Primeiru Ministru ho membru Governu sira mai hamutuk ho ita, entaun ita tenke hatudu ita-nia identidade orijinál nu’udar tradisaun kulturál Atoni Oé-Cusse ninian, atu kemomora loron proklamasaun 28 novembru iha Oé-Cusse,” nia katak.
Xefe suku Taiboko hosi sub-rejiaun Pante Makasar, Joaquim Tafin, agradese tanba iha loron istóriku 28 novembru autoridade inisiativa realiza karavana ne’e, atu hatudu no promove produtu lokál no tradisaun kulturál entre suku 18 iha Oé-Cusse.
“Ha’u apresia tebes tanba hosi 18 suku bele hatudu idak-idak nia konstume kultura, produtu lokál iha suku laran atu promove iha eventu importante ne’e, ne’ebé ohin ita haree kultura suku 18 lahanesan, idak-idak ho ninian, entaun ida-ne’e sai buakae ida ba jerasaun foun atu banati tuir labele haluha,” nia kontente.
Entretantu, aprezentasaun iha karavana kulturál ne’e, maka hanesan, hatais tradisaun kulturál kada suku ho karáter inklui hahán tradisionál.
Nune’e mós Karavana kulturál ne’e, hahú iha Jardií Koreanu Oébau, liuhosi Padimau to’o rotunda merkadu Numbei, tún fali ba rontunda aeroportu Palaban hodi konsentra iha kampiaun fatin feira produtu lokál iha kampu merdeka 01 Maio, Palaban, suku Costa, sub-rejiaun Pante Makasar.
Jornalista: Abílio Elo Nini
Editór: Evaristo Soares Martins
