iklan

NASIONÁL, POLÍTIKA

Governu atribui sertifikadu títulu na’in ba rai iha Dili

Governu atribui sertifikadu títulu na’in ba rai iha Dili

Iha komemorasaun loron proklamasaun independénsia 28 novembru ba dala-47 ne’e, Governu liuhosi ministériu justisa atribui setifikadu títulu na’in ba rai ba família na’in-hitu hosi Metinaro, segunda (28/11). Imajen Tatoli/Nelia Ferenandes.

DILI, 28 novembru 2022 (TATOLI)—Prezidente Autoridade Munisípiu Dili (AMD), Guilhermina Filomena Saldanha Ribeiro, hateten iha komemorasaun loron proklamasaun independénsia 28 novembru ba dala-47 ne’e Governu liuhosi ministériu justisa atribui setifikadu títulu na’in ba rai ba família na’in-hitu hosi Metinaro.

“Iha komemorasaun ne’e, ita-nia komunidade na’in-hitu (7) hosi Metinaro, liuhosi Ministériu Justisa, Terras Propriedade atribui mós sertifikadu nain ba rai ba familia na’in-hitu iha selebrasaun 28 novembru hin,” Prezidente Autoridade Munisípiu Dili (AMD), Guilhermina Filomena, hateten ba jornalista sira hafoin komemora loron proklamasaun independénsia ba dala-47 iha resintu Administrasaun, Munisípiu Dili, segunda ne’e.

Nia informa, na’in ba rai ne’ebé simu sertifikadu ne’e kompete ba Ministériu Justisa no sertifikadu ne’ebé fó ba na’in-hitu ne’e, iha tinan kotuk hetan uma kbiit laek, entaun Governu hanoin fó atribuisaun ba ida-ne’e.

Tuir Governu liuhosi polítika Ministériu Justisa nian, sira sei atribui tan ba sira seluk hanesan iha Dili ne’e, kona-ba rai problema komplikadu uitoan tanba ema balun iha rai pedasuk ida na’in-tolu no haat bele sai na’in, entaun Governu presiza haree didi’ak.

Komunidade na’in-hitu hosi metinaro ne’ebé simu sertifikadu ne’e, sira prenxe duni kritériu nune’e Governu atribui sertifikadu na’in ba rai ba sira.

“Tuir Ministériu Justisa, Diresaun Terras Propiedade sira-na’in hitu priense kritériu lori hetan duni titlu na’in ba rai. Ohin sira simu ona, aban sira tenke ba fila-fali rejistu notariadu atu rejistu kona-ba asuntu prediáriu, tanba ita-nia lei kona-ba prediáriu iha ona, entaun sira tenke ba rejistu fali atu nune’e bele hetan númeru prediáriu,” nia hateten.

Iha parte seluk, Rui Gomes, hateten Prezidente Repúblika, José Ramos Horta, felisita povu Timor-Leste ne’ebé ohin komemora loron proklamasaun independénsia ba dala-47 ne’e.

“Ha’u hakarak felisita sidadaun ida-ida no konvidadu ida-ida iha ita-nia país no onra kontribuisaun ne’ebé sira kontinua halo ba konstrusaun ita-nia nasaun ho ita-nia misaun ho vokasaun ne’ebé espesiál tebes. Hanesan ita hotu hatene, kna’ar ne’e la fásil, ita hotu halo ona sala no ita hotu hetan benefísiu hosi vizaun ne’ebé tuir ita-nia errus. Ita tenke matan moris no neon na’in nafatin hodi buka evita halo sai ba erru buat sira-ne’ebé tuir loloos la’ós erru katak krimes. Ita-nia kna’ar ne’e todan no kompleksa tebes, maibé sei sai kma’an se líder ho desizór sira hotu servisu hamutuk, halo kooperasaun no ho valór no espritu ne’ebé Avo Xavier ho Nicolau Lobato hodi harii ita-nia independénsia,” Ministru Finansa (MF), Rui Gomes, hateten bainhira lee Prezidente Repúblika, José Ramos Horta nia diskursu iha ámbitu komemorasaun loron proklamasaun indepedénsia ba dala-47 iha resintu Munisípiu Dili, segunda ne’e.

Nia hateten, fundadór sira nasaun ne’e nian hatene katak tenke matan moris no neon na’in nafatin hodi serbisu hamutuk harii Timor-Leste nia kultura espesiál, ne’ebé bazea iha espíritu unidade hodi buka nafatin alkansa no reafirma igualdade, direitu ba edukasaun, ba servisu no ezersísiu direitu polítiku.

“Avo Xavi, Nicolau Lobato ho Avo Nana hamutuk ho líder sira seluk mesak ema internationálista. Sira la fiar katak ita bele izola an ka moris ketak iha mundu ne’e,” nia dehan.

PR kondekora veteranu na’in-50

Entretantu, Reprezentate Rejiaun Autónoma Jebra Seleriu iha Dili, CaetanuoGonzaga dos Santos, hateten iha komemorasaun loron proklamasaun independénsia bad ala-47 ne’e, Prezidente Repúblika, José Ramos Horta, kondekora veteranu na’in-50 iha munisípiu Dili ho ordem no Nicolau Lobato no Funu Na’in.

“Ami iha Dili hamutuk ema na’in-50, ho grau ida no ordem rua (2), hanesan ordem funu na’in ema na’in-lima (5) no Nicolau Lobato ema-45,” Caetano Gonzaga dos Santos hateten ba Agência Tatoli iha resintu Autoridade Munisípiu Dili, segunda ne’e.

Tuir nia, kondekorasaun ne’e verifikasaun desde 2003 to’o 2005, nune’e ohin foin kondekora ba veteranu-50.

“Ida ne’e, seida’uk hotu no sei hela 6.700-resin ba nível nasionál, ne’ebé agora iha nível nasionál kondekora 6.28, kada munisípiu kondekora 50, só munisípiu Suai mak kondekora ema-28 de’it. Agora iha Suai 28 rejista oja 2003 no 2005 nian laiha ona, tanba kondekora hotu ona no agora ami sei kontinua iha munisípiu seluk-seluk nian,” nia esplika.

Veteranu hosi postu administrativu Metonaro, Marcos Amarál “Terus”, sente orgullu ba simu kondekorasaun ne’e tanba Governu bele rekoñese nia parte hanesan kombatente libertasaun nasionál.

“Ha’u sente orgullu bo’ot tanba durante tinan naruk, Governu bele rekoñese ami sai mós hanesan kombatente libertasaun nasionál no Governu fó mós valór mai ami hanesan mós luta-na’in ida. Durante funu naruk iha situasaun ne’ebé defisil, ami nafatin halo ami-nia esforsu tomak hodi ami nafatin kontinua ami-nia luta, ba oin to’o ohin loron konsege Governu rekoñese ami hanesan luta na’in ka funu na’in ida. Entaun, haree hosi verifikasaun ne’ebé Governu deside ona ba ami bainhira de’it, ami prontu atu bele asesu ba ami-nia direitu ne’ebé Governu prepara ba ami,” nia dehan.

Veteranu ne’e nia involvimentu iha baze apoiu durante tinan tolu no fulan 10 iha 1975, nia parte iha ai-laran ona, bainhira nia sa’e ba ai-laran ho segunda klasse no tun fali mai vila iha 1979 kontinua fali klandestina iha 1986 to’o 1999.

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!