iklan

NASIONÁL, JUSTISA, HEADLINE, LEI, SEGURANSA

Horta dezafia Autoridade Seguransa asegura prejunsaun inosénsia

Horta dezafia Autoridade Seguransa asegura prejunsaun inosénsia

Prezidente Repúblika (PR), José Ramos Horta. Imajen Tatoli/Anito Soares.

MANATUTO, 28 novembru 2022 (TATOLI)—Prezidente Repúblika (PR), José Ramos Horta, dezafia Autoridade Seguransa liu-liu Polísia Nasionál Timor-Leste (PNTL), atu asegura direitu sidadaun ida-nian bainhira komete krime ruma tanba seidauk iha desizaun finál hosi tribunal mak konsidera prejunsaun inosénsia.

Notísia Relevante: PR Horta krítika setór justisa iha komemorasaun loron proklamasaun indepedénsia dala-47

“Ha’u akompaña kazu famozu agora iha Timór kona-ba droga, bainhira ha’u haree Polísia nia atividade ho televizaun barak haree fali hanesan problema ne’e iha sidade ruma iha Colombia ka iha México. Ita gosta hatudu an, gosta mediatiza buat hotu-hotu, nein para uitoan atu hanoin sé nia viola privasidade ema ne’e, ne’ebé enkuantu tribunál superiór hasai desizaun nia inosente, ita halo tiha ona julgamentu ba nia liuhosi mídia. Akontese dala barak loos, depois Estadu nia kompesasaun ba ema sira-ne’ebé hetan julgamentu falsu, sentensa falsu, ejezeradu,” Xefe Estadu hato’o preokupasaun ne’e liuhosi diskursu, iha ámbitu komemorasaun loron proklamasaun independénsia ba dala-47, iha suku Aiteas, postu administrativu Manatuto Vila, munisípiu Manatuto, segunda ne’e.

PR Horta ne’e kompromete, nu’udar Xefe Estadu sei defende makaas iha Timor-Leste no mundu protesaun ba akuzadu sira, katak se tau ema arbiru iha kadeia depois ikus mai la kulpadu, Estadu tenke selu indemnizasaun, tantu indemnizasaun ba danu materiál no morál.

“Ita labele kaer ema arbiru tau iha kadeia, depois deskobre tinan tolu ka tinan lima liu tiha afinál inosente, ka hatene ema inosente komesa hakiduk, kuandu hakiduk signifika halo julgamentu sala,” nia hatutan.

Akontesementu ne’e la’ós iha Timor de’it maibé iha nasaun seluk hanesan Amérika mós akontese.

“Ha’u admira tebtebes sistema judisiál Amérika nian, sira iha korajen rekuiñese juiz sira halo desizaun sala maibé dala ruma rekuiñese tinan 50 liu tiha, ema ne’e hetan tiha ona ezekusaun pena morte maibé sira rekuiñese. Nne’eduni, papél ba juiz sira todan tebe-tebes ha’u rekuiñese, sira hetan presaun oioin karik maibé presaun liu ba sira la’ós mai hosi polítiku sira. Presaun boot liu ba sira mai hosi ONG sira, sosiedade sivíl ne’ebé partilizadu no politizadu halo presaun ba juiz, prokuradór, ita kuiñese kazu sira-ne’e,” Xefe Estadu halo komparasaun.

Ne’eduni, Horta dehan, durante mandatu sei kontribui hadi’a sistema justisa iha Timor-Leste.

Laureadu Prémiu Nobel Paz ne’e enkoraja hirak ne’ebé hala’o kna’ar iha setór justisa tenke estuda kle’an, kualifikasaun ba setór justisa tenke rigorozu liután hanesan médiku sira.

“HotU-hotu servisu iha setór justisa kualifikasaun akadémika tenke di’ak no kualidade, tenke iha esperiénsia, formasaun permanente. Sira tenke ema-ne’ebé independente duni, signifika la sadere ba partidu polítiku no partidu polítiku labele buka influénsia setór justisa, tenke iha integridade akadémiku no integridade intelektuál, eziiensia ba sira boot liu setór seluk,” nia dehan.

Jornalista : Antónia Gusmão.

Editór       : Cancio Ximenes 

iklan
iklan

Leave a Reply

iklan
error: Content is protected !!