José Reis: “Presiza rekoñese erru ne’ebé ita halo durante tinan 20-resin”

COVALIMA, 28 novembru 2022 (TATOLI)–Segundu Vise Primeiru-Ministru, José Maria dos Reis, hateten komemorasaun loron proklamasaun independénsia Timor-Leste ba dala-47 presiza atu rekuñese erru durante tinan 20-resin.
“Ita-bele hatene loloos ita-nia presente ba oin ita bele prevene erru, hanesan ema hateten povu bainhira lahatene nia-istória nia kondenadu atu halo sala beibeik tanba ne’e istória importante ba ita. La’os ho istória ita la’o ba kotuk ho istória ita bele hatene no hateke di’ak liután ba oin. Primeiru, ita tenke respeita malu rekoñese prezente katak rekoñese erru buat ne’ebé ita halo durante tinan 20-resin ona ita-nia restaurasaun independénsia ita la’o ona dalan los ka lae,” José Maria dos Reis, hato’o liuhosi diskursu iha serimónia isár bandeira 28 novembru, iha Kampu Futeból Ladi, Covalima, segunda ne’e.
Nia apela, hosi nasionál to’o iha baze tenke asume responsabilidade iha komemorasaun ida-ne’e fó “um minutu silensia” (minute ida hakmatek) ba eroi sira-ne’ebé fó sira-nia isin hodi kaer metin prinsípiu hametin Estadu Repúblika Demokratika Timor-Leste.
“Ha’u atu apela ba ita-hotu atu bele asume responsabilidade ida-ne’e hosi nasionál to’o iha baze. Ohin ita halo um minitu silensiu, tanba ema sira-ne’ebé fo isin no raan ho determinasaun no korajen hodi kaer metin prinsípiu no valór atu hametin Estadu Republika Demokratika Timor Leste (RDTL), ita kontinua ho valór ida-ne’e ka lae,” nia apela,
Tanba ne’e, presija haree ba kotuk katak eroi sira mate tanba saida, ida asume responsabilidade hodi hateke ba oin no labele halo sala ne’ebe iha ona, hadi’a di’akliu saida mak di’ak sira husik ona.
“Tinan 20 ona, hanesan membru Governu, ami rona nafatin povu halerik ba bee-moos, estrada, irrigasaun seidauk di’ak, buat barak seidauk halo, ita tenke rekoñese ida-ne’e bele hadi’a di’akliu ba oin,” nia hateten.
Iha serimónia isár bandeira ne’e, Segundu Vise Primeiru-Ministru, José Maria dos Reis, mós entrega sertifikadu rai ba komunidade no entrega prémiu ba manán-na’in jogu voleyvol feto no mane.
Hafoin ramata, membru Governu hosi kampu ladi hakat liu ba iha Aeroportu Internasionál Komandande em-Xefe Kay Rala Xanana Gusmão hodi halo inaugurasaun barede nasionál estasaun referénsia global nabigation satellite System (GNSS) no Continuously operating reference station (CORS) Timor-Leste
Notísia Relevabte:
Jornalista : Celestina Teles
Editór : Cancio Ximenes

