Vise MEJD husu Viqueque-oan kria pás no estabilidade

VIQUEQUE, 28 novembru 2028 (TATOLI)—Vise Ministru Edukasaun Juventude no Desportu (MEJD), António Guterres, husu Viqueque-oan sira tenke kria pás no establidade hodi kontribui ba prosesu dezenvolvimentu iha Timor-Leste.

“Ohin ita hotu komemora 28 novembru ba dala-47, ha’u reprezenta Xefe Estadu no Governu mai komemora iha Viqueque. Munisípiu Viqueque dezde tempu uluk mós la lakon espiritu iha prosesu libertasaun nasionál. Buat ne’ebé ha’u hakarak husu munisípiu ida-ne’e sai mós hanesan munisípiu exemplar hodi kria pás no establidade, tanba dezenvolvimentu la’o ba oin presiza kria unidade, establidade hodi humutuk lori dezenvolvimentu la’o ba oin,” Vise Ministru Edukasaun Juventude no Desportu (MEJD), António Guterres, hafoin komemora loron proklamasaun independénsia ba dala-47 iha kampu Demokrasi, postu Viqueque villa, segunda ne’e.

Governate ne’e hatutan, esperansa ba oin nasaun Timor-Leste bele sai dezenvolvidu liután, maske oin loron dezenvolvimentu la’o neineik maibé sei kontinu la’o ba oin.

“Ita hotu nia esperansa ba oin ita-nia rai bele dezenvolvidu liután. Maske oin loron dezenvolvimentu la’o neineik maibé ita haree dezenvolvimentu kontinu la’o, ida-ne’e sai pasu importante ba ita hodi hakat ba oin nafatin,” nia dehan.

Hafoin serimónoa isár-bandeira ramata, membru Governu ne’e hamutuk ho autoridade no liña ministeriál sira daur hamutuk ho komunidade munisípiu Viqueque hodi festeza loron 28 novembru.

Nune’e mós iha serimónia ne’e estudante Kafé no estudante 04 Setembru Viqueque mós parezenta expo ba rezultadu prátika no reziklajen iha ambitu komemorasaun 28 novembru ne’e no ho atividade seluk mak hanesan sae bua, dada tali no halai taru iha karon laran.

Jornalista : Vitorino Lopes da Costa

Editór      : Cancio Ximenes