BAUCAU, 29 novembru 2022 (TATOLI) – Komunidade hamutuk rihun 2.700 resin iha suku Triloka, postu administrativu Baucau Vila sai benefisiáriu ba cesta bázika iha tinan ne’e.
Xefe suku Triloka, Alexandre da Costa, esplika, hosi númeru refere maihosi xefe família hamutuk 607 komposta hosi aldeia haat ne’ebé kompleta ona dadus no hein distribuisaun hosi kompañia responsável.
“Cesta bázika ami seidauk simu tanba ladauk iha informasaun hosi kompañia ne’ebé mak atu distribui,” Xefe suku Triloka informa ba Agência TATOLI iha Vila Antiga, tersa ne’e.
Alexandre da Costa seidauk iha informasaun serteza kona-ba data atu distribusaun cesta bázika iha Triloka hafoin programa refere lansa iha munisípiu Baucau iha fulan-novembru.
Autoridade suku Triloka agradese ba governu no konsidera ho ajudu cesta bazika importante tanba bele hakmaan ona komunidade sira-nia ekonomia uma-laran iha fim do ano.
Maioria komunidade suku Triloka moris nu’udar agrikultór nune’e autoridade suku husu kompañia distribui mak sasán fabrikanu tanba importante ba komunidade sira atu utiliza hanesan sabaun, susubeen no seluk tan.
Suku Triloka iha aldeia haat hanesan aldeia Aubaca, Baduho’o, Macada’e no Leciloiwatu ho total populasaun 2.700 resin hosi uma-kain 607.
Jornalista : Natalino Belo
Editór : Evaristo Soares Martins
