iklan

NASIONÁL, POLÍTIKA

Fundasaun Alola sei realiza feira natál promove tais no produtu lokál

Fundasaun Alola sei realiza feira natál promove tais no produtu lokál

Vendedora hosi Grupu Bobometo, Marta da Costa no Elsa Ximenes, prepara hela nia produtu tais, iha ambitu Feira Produtu Kultural no Turizmu hosi Artezenatus Komunidade Bebonuk, iha Arts Center AEMTL Colmera Dili, kinta (25/08). Imajen Tatoli/Francisco Sony

DILI, 29 novembru 2022 (TATOLI)—Jerente Empoderamentu Ekonómiku Feto iha Fundasaun Alola, José Ximenes, informa tuir planu iha fulan dezembru tinan ne’e Fundasaun Alola sei realiza feira natal atu promove tais no produtu lokál hosi grupu artezenatu sira.

“Objetivu ba atividade ne’e mak atu promove ita-nia produtu lokál, liu-liu ba grupu artezenatu sira-nia produtu atu nune’e bele hetan rendimentu tanba situasaun defisil merkadu ba artezenatu, entaun liuhosi feira ne’e bele promove sira-nia produtu lokál. Aleinde ne’e, ita mós prezerva ita-nia identidade lokál Timor nian liu-liu tais, tanba tais ita rejistu ona iha UNESCO no mundu rekoñese ona, entaun ita kontinua halo nune’e hodi prezerva ita-nia tais sai identidade Timor nian,” José Ximenes hateten ba Agência Tatoli iha nia kna’ar fatin, Dili, segunda ne’e.

Tuir nia, feira ne’e kada tinan Fundasaun Alola halo no ida-ne’e bolu feira natál, aleinde ne’e selebra mós loron nasionál ba tais.

“Tanba, tais foin daudaun rejistu ona iha UNESCO no hetan rekoñesimentu ona, alainde ne’e Governu mós estabelese ona loron nasionál ba tais iha 14 dezembru, entaun feira ne’e ami selebra mós loron nasionál ba tais,” nia informa.

Maske nune’e, iha feira ne’e Fundasaun Alola sei halibur grupu soru-na’in no artezenatu sira atu mai promove sira-nia produtu lokál, nune’e bele hetan rendimentu.

“Iha feira ne’e, ita halibur ita-nia grupu soru-0na’in no artezenatu sira atu mai promove sira-nia produtu lokál ba sosa na’in sira, nune’e sira bele hetan rendimentu hosi sosa na’in sira-ne’ebé vizita hodi hola ba sira-nia familia no maluk sira-ne’ebé presiza,” nia dehan.

Entretantu, atividade feira ne’e, sei hahú iha loron 03 to’o 04 fulan dezembru tinan ne’e, no partisipante mai hosi grupu ne’ebé Fundasaun Alola estabelese ona mak rede soru-na’in hanesan iha Baucau, Viqueque, Liquiça, Oé-Cusse, Bobonaro, Covalima no munisípiu sira seluk hamutuk grupu 50-resin ne’ebé mai hosi munisípiu 12, inklui Autoridade Rejiaun Administrativa Espesiál Oé-Cusse Ambeno (RAEOA).

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!