Kompañia Watubesi finaliza ona dada eletrisidade ba komunidade Zumalai
COVALIMA, 29 novembru 2022 (TATOLI)–Xefe Unidade Elterisidade de Timor-Leste Empreza Públiku (EDTL, E.P) Covalima, Alexandre Seran, informa Kompañia Watubesi Unipesoál, Lda, finaliza ona dada eleitrisidade ba komunidade iha suku Usecai no Mape iha postu administrativu Zumalai, munisípiu Covalima.
“Ha’u mós to’o iha fatin hodi haree rasik hein atu inaugura de’it ona, maibé sei hein despaixu hosi prezidente EDTL, E.P orienta ami atu halo fali inspesaun tama-uma no sai-uma hodi sura ai-riin eletrisidade no sasán ne’ebé mak kompañia halo instalasaun bainhira kompañia finaliza ona entaun ita inaugura ona,” Alexandre Seran hateten ba Agência Tatoli, iha Bairru Costa, Covalima, tersa ne’e.
Komapañia Watubesi Unipesoál, Lda, dada eletrisidade iha postu administrativu Zumalai iha suku Mape ho Usecai ne’ebé prosesu konkursu ramata ona, agora kompañia hala’o hela servisu atu halo inaugurasaun ba fatin refere
“Kompañia Watubesi maske hala’o servisu kle’ur ona maibé foin lalais tuir konkursu mak foin manán kontinua servisu no halo ona instalasaun,” nia dehan.
Durasaun tempu ba komapañia halo instalasaun eletrisidade ne’e durante fulan neen maibé instalasaun kompañia besik finaliza ona hein tempu besik bele inaugura ona.
Administradór postu administrativu Zumalai, Rui dos Santos, hateten kompañia dada fiu metan no instalasaun ba komunidade nia uma hotu ona maibé hein de’it ahi atu lakan.
“Kompañia dada hotu ona fiu metan no finaliza ona instalasaun eletrisidade iha komunidade ida-idak nia uma, maibé bainhira mak atu lakan ha’u ladún hatene,” nia dehan.
Jornalista : Celestina Teles
Editór : Cancio Ximenes
