PM Taur husik hela mensajen rua ba povu Oé-Cusse

OÉ-CUSSE, 29 novembru 2022 (TATOLI) – Primeiru Ministru Taur Matan Ruak, husik hela mensajen rua ba povu Atoni atu halo reflesaun.

Primeiru Minsitru Taur Mata Ruak, akompaña hosi Ministru Justisa, Tiago Sarmento Amarál no Ministru ba Asuntu Parlamentár no Komunikasaun Sosiál (MAPKomS), Francisco Martins Jerónimonimo, hamutuk ho ekipa delegasaun tersa ne’e, dezloka ona ba Díli, hafoin hamutuk ho populasaun Rejiaun Administrativa Espesiál Oé-Cusse Ambeno (RAEOA) selebra loron proklamasaun independensia Timor-Leste ba dala-47 iha segunda 28 novembru 2022.

Nune’e molok dezloka ba Dili, Xefe Governu, tatoli mensajen importante rua ba povu Oé-Cusse atu kumpre, iha ámbitu jantár confraternizasaun, ne’ebé realiza iha otél Ambeno, Oé-Cusse segunda kalan ne’e.

Iha biban ne’e Primeiru Minsitru Taur Mata Ruak, fó parabéns ba Prezidente Autoridade ho membru tomak inklui funsionáriu sira, jestór sub-rejiaun no xefe suku sira, veteranu, tanba hamutuk ho povu Oé-Cusse konsege halo ona mudansa ba progresu dezenvolvimentu, tanba serbisu barak iha Oé-Cusse, liuliu ZEESM tutela direta iha Primeiru Ministru nia okos, entaun presiza halo avaliasaun dezempeñu ba lala’ok serbisu sira hotu iha Oé-Cusse.

“Ha’u hakarak hato’o mensajen rua ba imi hotu iha kalan ida-ne’e, primeiru hato’o parabéns ba Oé-Cusse, tanba ohin ita mai fali iha mudansa boot, tanba saida? ida-ne’e importante, tanba nasaun só ita dezenvolve, sei ita ema no sidadaun sira kontente, fó valorizasaun ba nia moris rasik, ida-ne’e maka iha sentidu, tanba iha sentidu ita la tau importánsia ba vida, ne’e sentidu laiha ba ita, tán ne’e ha’u lori VIII Governu nia naran hakarak hparabeniza Autoridade RAEOA no povo Oé-Cusse tomak, ha’u hakarak ba oin kontinua nafatin hanesan ne’e,” Primeiru Ministru hateten.

Tanba agora sei imi mesak, maibé iha futuru neneik-neneik Oé-Cusse sei rame, la izoladu ona hanesan tinan hirak ba kotuk, tanba ita boot sira haree Oé-Cusse rai enklave nia beleza furak bele atrai ema hosi nasaun seluk bele mai vizita imi, entaun kontinua nafatin hanesan ne’e.

“Mensajen daruak, ha’u hakarak husu aumenta produtividade ba ita-nia inan-aman sira, iha territóriu Timor laran tomak, ha’u haree fatin hotu-hotu ne’ebé obra sira iha, Oé-Cusse oan sira iha hotu, entaun aumenta ita-nia produtividade ba rendimentu, no aumenta rendimentu, aumenta kualidade vida moris, tán ne’e ha’u husu  kontinua nafatin ho esforsu tomak,” nia afirma.

Tuir nia katak, Oé-Cusse tenki kontenti, iha munisipíu 13, nia osan tau hamatuk la to’o osan ne’ebé ita-bo’ot sira simu, Dili de’it millaun $11, abitante iha rihun 11-resin, Oé-Cusse mesak milaun $120, ne’e signifika Governu Sentrál fó importánsia maka’as ba Oé-Cusse.

“Agora ita-boot sira mós tenke korresponde ho ami-nia esforsu ida-ne’e, katak ita-bo’ot sira merese, ami-nia admirasaun, ami-nia domin, no ami hakarak retribui , Atauru abitante ladún barak, ninia orsamentu millaun $16, entauan Governu fó maka’as ne’e responsabilidade ida, la’ós tanba Oé-Cusse Atauru oin di’akliu Díli, maibé ne’e responsabilidade ida,” nia fó hanoin.

“Ikuliu ha’u agradese ohin ita-bele jantár kalan hamutuk, aban ita fahe malu ona, idak-idak ba nia fatin, ba nia serbisu, kontinua nia atividade nafatin, serbí ita-nia nasaun hamutuk labele fahe malu, Oé-Cusse tenki sai ezemplu ba buat hotu-hotu,” Xefe Governu apela.

Iha parte seluk, Xefe Governu fó parabéns ba populasaun sira iha Rejiaun Administrativa Espesiál Oé-Cusse Ambeno (RAEOA), tanba hamutuk ho autoridade sira kontribui halo rai Oé-Cusse sai moos no furak kompara ho tinan kotuk.

“Primeiru ba iha ambiente ha’u kontente limpeza sidade nian ho organizasaun kapaas, foin daudaun Prezidente Autoridade hatete iha Parlamentu Nasionál, katak Oé-Cusse sai sidade moos, ha’u konfia, no haree ona katak, loos duni Oé-Cusse moos, uluk ha’u sei Prezidente Repúblika ha’u mai vizita beibeik, entaun Oé-Cusse laran to’o área remota ha’u domina, agora ha’u hanesan Primeiru Ministru ha’u admira ba mudansa sira, lahanesan uluk ona,” Xefe Governu felisita.

Xefe Guvernu ne’e fó hanoin nafatin ba populasaun sira, liuliu joven sira, atu kria pás no dame, tanba Oé-Cusse rai enklave, dook hosi kapitál nasaun susar tebes atu asesu ba kapitál bainhira iha situasaun emerjénsia hanesan durante COVID-19.

“Ha’u hakarak imi hamutuk ida de’it labele fahe malu, imi mesak rai ketan hotu, presiza imi nia apoiu hamutuk ho inan-aman sira, serbisu hamutuk ho imi nia autoridade,” Xefe Governu fó hanoin.

Jornalista: Abílio Elo Nini
Editór: Evaristo Soares Martins