iklan

COVID-19, HEADLINE, MUNISÍPIU, OÉ-CUSSE (RAEOA), SAÚDE

PM Taur reativa klínika coração iha RAEOA

PM Taur reativa klínika coração iha RAEOA

PM Taur reativa klínika coração Oé-Cusse no futuru sai sentru alternativa Timor-Leste. Imajen Tatoli/ Abílio Elo Nini.

OÉ-CUSSE, 29 novembru 2022 (TATOLI) – Primeiru Ministru Taur Mata Ruak, hamutuk ho Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, tersa ne’e reativa fila-fali Klínika coração ihaOé-Cusse, hodi fó atendimentu públiku ba komunidade sira-ne’ebé presiza halo tratamentu ba saúde.

Xefe Governu, Taur Matan Ruak, enkoraja profisionál saúde sira iha Oé-Cusse atu kontinua aposta iha atendimentu ho kualidade tanba iha futuru klínika ne’e sei sai sentru alternativa ba povu Timor-Leste.

“Ha’u husu de’it ba imi lalika ba kotuk, hatudu nafatin ita-boot sira-nia vontade, halo serbisu di’ak tanba ita tenke aposta iha atendimentu di’ak no mós tenke aposta iha kualidade atendimentu ne’e di’ak atu Oé-Cusse ne’e bele sai duni alternativa ba populasaun Timor-Leste bainhira sira persiza tratamentu saúde ne’e di’ak, tanba ha’u hatene fatin ne’e aban bairua sai sentru ema hotu iha país ne’e,” Primeiru Ministru Taur Mata Ruak hateteten iha Oé-Cusse, tersa ne’e.

Iha fatin hanesan, Prezidente Autoridade RAEOA, Arsénio Paixão Bano, esplika, orsamenta atu aumenta fasilidade no hasa’e espesiaalidade ba profisionál saúde sira hodi reforsa atendimentu públiku ho kualidade iha klínika ne’e.

“Ohin, ita kontente tebes ita reativa fila-fali klínika coração ne’ebé maka kuaze tinan rua ita uza tiha ba fatin izolamentu ba COVID-19 ninian, entaun ohin ba oin ita bele uza ba halo tratamentu ba saúde,” nia katak.

Nia dehsn, servisu sentrál Ministériu Saúde nian, ospitál ho klínika ne’ebé mak atu hari’i ne’e, la troka ida, ida-ne’e sai alternativa ba povu Timor-Leste, sei Díli nakonu liu bele mai Oé-Cusse, koordenasaun bele halo ho Ministériu Saúde hanesan daudaun ne’e halo evakuasaun ba pasiente sira bele mai entaun espesialista sira mós sei ba mai.

“Entaun klínika coração bele atende serbisu ida-ne’e, hanesan mós Díli iha futuru kuandu hari ona, bele iha fatin rua, duké haruka ita-nia ema sira semo ba estranjeiru, entaun ita hahú prepara ba tinan 10 mai, ha’u hanoin Timor-Leste bele ona, no Oé-Cusse mós bele atende ona ida-ne’e,” nia afirma.

Jornalista: Abílio Elo Nini
Editór: Evaristo Soares Martins

iklan
iklan

One Comment

  1. Karu Média Tatoli,

    Hau atu informa katak hau uza ona média Tatoli hodi buka informasaun ruma kona-ba ha’u-nia servisu. Bainhira uza média ne’e ha’u sempre kopia nia link. Maibé ha’u la hatene tanba sá ha’u labele kopia link refere. Bainhira ha’u kopia link ne’e no fahe ba ema seluk nune’e sira mos bele lee informasaun ne’e uza de’it link ne’e. Favor bele esplika tanba sá hau labele kopia link ne’e.

    Obrigadu no kontinua sai susesu.

Leave a Reply

iklan
error: Content is protected !!