Suku rua iha Vera Crúz simu ona Cesta Bázika
DILI, 29 novembru 2022 (TATOLI)—Administradór postu administrativu Vera Crúz, munisípiu Dili, Manuel Gusmão, informa benefisiáriu programa Cesta Bázika iha suku rua (2) iha postu administrativu Vera Crúz simu ona Cesta Bázika.
“Cesta Bázika ba tinan ne’e foin mak hahú iha suku rua (2) ne’ebé agora daudaun la’o hela, mak suku Vila Verde iha aldeia tolu (3) hanesan Matua, Mate Moris ho Mate Restu no iha suku Mascarenhas mak aldeia Manu Kokorek ho aldeia Zero Trez. Entaun aldeia lima (5) ne’ebé iha aldeia 51 ne’e aldeia tolu (3) mak aldeia Mate Restu no Matua mak foin hahú atu sira simu no aldeia rua (2), hanesan Manu Kokorekho xefe família 219 no Zero Trez ho xefe família 213 mak kompañia oferese ona Cesta Bázika ba sira,” Manuel Gusmão hateten ba Agência Tatoli iha nia kna’ar fatin, Dili, tersa ne’e.
Nia informa, iha Vila Verde ho totál aldeia sia (9) no xefe familia atu simu Cesta Bázika hamutuk 3.410 no abitante 15.642.
Entaun, ba suku Vila Verde aldeia haat (4) iha ona kontratu ho kompañia mak Matua, Mate Moris, no aldeia Nopen ne’ebé se la sala aban ka bainrua sira distribui ona, nune’e falta aldeia lima (5) ne’ebé seidauk iha kontratu ho kompañia maka aldeia Guideon, Lemorai, Um de Setembru, Terus Nain no Virgolosa.
Iha suku Mascarenhas iha aldeia neen (6) ho xefe familia 1.364 no abitante 6.589 ne’ebé atu simu Cesta Bázika, maibé aldeia rua (2) hanesan aldeia Manu Kokorek no Zero Trez simu ona cesta bázika.
Iha postu administrativu Vera Crúz iha suku hitu (7) hanesan suku Dare, Lahane Osidentál, Mascarenhas, Vila Verde, Caicoli, Colmera, Motael.
Iha suku hirak ne’e, suku Vila Verde no Mascarenhas mak iha ona kompañia fornesedór hodi halo distribuisaun Cesta Bázika no suku lima seluk hanesan Motael, Dare, Caicoli, Colmera no Lahane Osidentál mak kompañia sei iha prosesu konkursu públiku.
Tuir nia, kona-ba kualidade produtu Cesta Bázika ne’e durante iha prosesu distribuisaun ne’ebé kompañia fahe ona ba komunidade iha aldeia Manu Kokorek no Zero Trez ne’e, nia parte seidauk simu informasaun kona-ba komunidade ninia lamentasaun ba kualidade produtu Cesta Bázika.
“Ha’u rasik to’o agora seida’uk simu reklamasaun ruma hosi komunidade, katak suku ida-ne’e simu Cesta Bázika nia kondisaun hanesan ladi’ak ka kualidade produtu ladún di’ak,” nia dehan.
Kona-ba presu produtu, nia esplika, kompañia distribuidór sira bainhira halo distribuisaun Cesta Bázika iha kada suku ne’e, sira taka kompletu kedan ona iha banner ne’e presu kada produtu nune’e hafasil komunidade sira bainhira foti produtu.
“Ba suku Mascarenhas ha’u ladún hatene maibé iha Vila Verde sira-nia presu sira (kompañia) taka ka hakerek iha banner, nune’e komunidade atu mai simu sira haree uluk hanesan repollu, foremungu no produtu seluk ne’e nia presu hira, ida ne’e sira haree hotu,” nia hatetetn.
Iha prosesu distribuisaun Cesta Bázika ba tinan ne’e diferensa tebes ho tinan kotuk, tanba komunidade iha uma kain atu troka produtu balun tenke iha aprovasaun entre ministériu relevante no na’in ba kompañia sira.
“Distribuisaun agora lahanesan ho tinan kotuk. Ezemplu, sasán hanesan repollu laiha sira atu troka ho has-fuan kompañia la troka de’it iha terrenu, tanba tenke hetan aprovasaun hosi ministériu, ida-ne’e tuir informasaun ha’u hetan. Tanba, uluk sasán ka produtu ne’ebé laiha bele troka iha fatin, ida-ne’e tuir ha’u observa iha Vila Verde,” nia informa.
Entretantu, tuir dadus ne’ebé Agência Tatoli asesu hosi administradór postu administrativu Vera Crúz, Manuel Gusmão, katak suku hitu (7) ne’ebé atu simu Cesta Bázika hanesan suku Motael iha xefe familia 1293 no abitante 1449, suku Mascarenhas iha xefe familia 1364 no abitante 6589, suku Dare iha xefe familia 821 no abitante 3802.
Suku Vila Verde iha xefe familia 3410 no abitante 15,642, suku Caicoli iha xefe familia 1133 no abitante 848, suku Lahane Osidentál iha xefe familia 1481 no abitante 6945 no suku Colmera iha xefe familia 414 no abitante 2058, no hosi ne’e aldeia rua (2) iha suku Mascarenhas mak simu ona Cesta Bázika no seluk seidauk.
Jornalista : Nelia Fernandes
Editór : Cancio Ximenes
