VIII Governu prioritiza rekursu umanu
OÉ-CUSSE, 29 novembru 2022 (TATOLI) –VIII Governu fó proridade ba rekursu umanu tanba ema mak sai sentru ba dezenvolvimentu.
“Polítika VIII Guvernu ne’ebé agora daudaun ha’u lidera, hili prioridade ida de’it ba iha governasaun durante tinan lima, primeiru ema, segundu ema, terseiru ema,” Primeiru Ministru Taur Mata Ruak, ko’alia iha diskursu inaugurasaun ne’e klínika coração Oé-Cusse, tersa ne’e.
Xefe Governu ne’e fundamenta, prioridade tolu ne’e organizadu ho aspetu tolu ne’e importante, primeiru, hakarak ema saúde di’ak no nia moris naruk.
“Sei ita hotu analiza perfil ida-ne’e, Timor-Leste sei iha problema barak ho kazu moras oinoin, tan ne’e VIII Governu tau importánsia maka’as ba ema dezde hahú hosi nia moris iha kabun laran to’o nia boot hanesan programa bolsa da mãe jerasaun foun gaora ita la’o ona,” nia afirma.
Daruak, prioridade ba ema nafatin, ba iha koñesimentu siénsia no teknolojia, ida-ne’e liga ba edukasaun, Governu halo esforsu ba prioridade ne’e, bele halo investimentu boot liután tán iha rekursu umanu.
Terseiru prioridade maka hadi’a padraun ema nia moris, kona-bá uma hela fatin, bee-moos, hahán, no sira hotu ne’ebé bele kontribui atu hadi’a padraun ida aseitavél, iha era foun ho prinsípiu dezenvolvimentu sira-ne’ebé nasaun hoti-hotu advoga kona-bá dezenvolvimentu inkluziva no sustentável.
“Ida-ne’e prioridade tolu ne’ebé Governu iha mandatu ida-ne’e, tanba ne’e iha projetu barak, ita tenke suspende atu depois kanaliza rekursu ba iha área sira-ne’ebé iha relasaun fó kontribuisaun ba iha aspetu tolu ne’e inklui parte saúde nian,” nia afirma.
Jornalista: Abílio Elo Nini
Editór: Evaristo Soares Martins
