DILI, 30 novembru 2022 (TATOLI) – Diretor Tékniku Sentru Juveníl Timor-Leste (STL), Agustinho Martins informa antes ne’e hala’o ona kompetisaun futeból ba jogadór juveníl iha munisipiu hitu, nune’e iha fulan-dezembru sei mai partisipa eventu nasionál iha Dili.
Jogadór Under 6 (U-6) ne’ebé sei partisipa eventu nasionál mak hosi Munisípiu Lautem, Baucau, Ermera, Liquiça, Bobonaro, Suai no Dili.
“Ami tau prioridade liu ba jogadór under-6 (U-6) atu mai partisipa iha jogu ne’e, hodi haree no avalia jogadór ne’ebé jogu di’ak bele tama ba selesaun hodi partisipa jogu CPLP”, dehan Agustinho ba Agência TATOLI iha Dili, kuarta ne’e.
Tuir programa ne’ebé trasa ona jogadór hosi munisípiu hitu ne’e kada munisípiu mai ho ema na’in-18 hamutuk ho treinadór na’in-rua, nune’e totál ema na’in-20.
Jogu ne’e sei hala’o iha 12 dezembru mai ne’e iha Kampo Federasaun Futeból Timor-Leste (FFTL), Estádiu Munisipál Dili no sei kria mós festivál nasionál hodi anima labarik jogadór sira.
Atividade ne’ebé Sentru hala’o tanba hetan fundu másimu hosi Governu liuhosi Sekretáriu Estadu Juventude no Desportu (SEJD) ho kada tinan hamutuk rihun $140, hodi realiza jogu ba labarik sira sosa ekipamentu hanesan bola no seluk tan atu hala’o treinamentu.
Durante ne’e, Sentru Juvenil prodúz ona jogadór barak ne’ebé daudaun balun sai ona hanesan treinadór barak liu ho lisensa B, balu sei joga hela iha selesaun nasionál.
“Ami prodúz jogadór barak ona, maibé tuir kategoria la hanesan, U-8-10, U-10-12 no U-14-16, ne’ebé kada ekipa ida-idak to’o ema na’in-30, nune’e kada tinan. Treinadór ne’ebé durante fó treinamentu ba labarik sira hamutuk na’in-hitu mesak Timoroan hotu”, katak.
Enkuantu, Munisípu seluk ne’ebé seidauk iha Sentru Juveníl, daudaun esforsu hela tanba estabelesimentu ba sira nia fatin mak seidauk iha.
“Tanba atu estabelese sentru akademiku ne’e lori tempu, maibé iha tempu besik Sentru Nasionál sei estabelese hamutuk ho Governu”, nia kompromete.
Jornalista: Hortencio Sanchez
Editór : Florencio Miranda Ximenes
