Dioseze Baucau selebra aniversáriu ba tinan 25, Don Norberto husu sarani moris tuir São José
BAUCAU, 30 novembru 2022 (TATOLI) – Bispu Dioseze Maliana no Prezidente Konferénsia Episkopál Timorense (CET, sigla portugés), Norberto Amaral husu sarani hotu iha dioseze refere atu moris tuir São José.
Presidente CET ko’alia asuntu ne’e bainhira prezide misa selebrasaun ezisténsia Dioseze Baucau ba tinan-25.
Bispu Dioseze Maliana, Dom Noberto nu’udar selebrante misa aniversariu ezisténsia dioseze Baucau, esplika, São José ne’ebé sai padrueiru Dioseze Baucau hanesan ema-ne’ebé moris simples, halo kna’ar nu’udar kaben-na’in no halo tuir de’it aman maromak nia hakarak.
“Iha selebrasaun ida-ne’e, mai ita hotu halo reflesaun moris tuir São José tanba nia mak sai mahein ba Dioseze Baucau, São José ema-ne’ebé fiar kle’an no simples, justu, obidiente, vida interiór diak no serbisu maka’as,” Bispu Dioseze Maliana hateten iha Katedrál, Baucau, Vila Antiga, kuarta ne’e.
Dom Noberto salienta, bainhira haree ba tinan-25 ba kotuk dioseze Baucau hahú harii ho totál padre diosezanu na’in-sia no parókia oituan maibé hafoin tinan-25 iha aumenta ba padre hamutuk 40-resin ne’e hatudu iha dezenvolvimentu no sarani barak bele simu sakramentu.
Bispu Dioseze Maliana argumenta, iha selebrasaun tinan-25 ne’e Don Basílio do Nascimento husik hela sarani Dioseze Baucau tanba Maromak nia planu, nune’e husu ba sarani hotu iha Timor-Leste atu reza nafatin ba Maromak atu simu Don Basílio iha nia kadunan santu.
“Maromak nia planu, nia rasik mak hatene, husu ba maromak simu nia prémiu iha lalehan hamutuk ho anju hotu,” Dom Noberto akresenta.
Administradór Dioseze Baucau, Padre Alipio Pinto Gusmão, hateten, dioseze Baucau sei presiza rekursu barak tanba parókia balun foin iha padre na’in-ida nune’e husu seminarista sira atu estuda barak hodi sai amu-lulik iha tinan tuir mai tanba presiza partisipasaun ativa iha konferénsia episkopál.
Mesmu nune’e, Padre Alipio konsidera komponente hotu hahú hosi padre, madre, katekista to’o sarani hotu ne’ebé hola parte iha dioseze Baucau hotu-hotu importante iha ezisténsia dioseze Baucau durante tinan-25.
“Idak-idak hala’o nia kna’ar, buat hotu sai furak no kapaas, dioseze ne’e di’ak no buras liután,” Padre Alipio Gusmão enkoraja.
Dioseze Baucau hahú eziste iha lorom 30 novembru tinan-1996 ne’ebé antes ne’ebé lidera hosi saudozu Don Basílio do Nascimento.
Tuir dadus populasaun hamutuk 32.2300 (99.4%) nu’udar sarani Katolika ho totál padre hamutuk 40-resin ne’ebé hala’o kna’ar iha parókia hamutuk 21 hosi munisípiu haat, komposta hosi Baucau, Viqueque, Manatuto no Lautém.
Selebrasaun refere partisipa hosi Bispu Dioseze Dili, Don Virgílio Cardeal do Carmo da Silva, SDB, padre parókia Dioseze Baucau, madre sira, konvidadu sivíl, militár no sarani hosi munisípiu Manatuto, Viqueque, Lautem no Baucau.
Jornalista : Natalino Belo
Editór : Evaristo Soares Martins
