iklan

EDUKASAUN, COVALIMA

Ensinu pre-eskolár Covalima hala’o graduasaun dahuluk ba estudante na’in- 416

Ensinu pre-eskolár Covalima hala’o graduasaun dahuluk ba estudante na’in- 416

Koordenadora ensinu pre-eskola munisípiu Covalima muda fita estudante ida hosi ensinu pre-eskolár Salele, iha serimónia graduasaun dahuluk ba estudanta na’in-416, kuarta (30/11). Imajen Tatoli/Celestina Teles.

COVALIMA, 30 novembru 2022 (TATOLI)–Ensinu pre-eskolár 18 iha Covalima, kuarta ne’e, hala’o serimónia graduasaun dahuluk ba estudante sira hamutuk na’in-416.

Administradór munisípiu Covalima, Francisco de Andrade, hato’o parabéns ba profesór sira tanba iha ohin loron bele marka istória hodi hala’o serimónia graduasaun dahuluk ba estudante pre-eskolár iha Covalima.

Ensinu pre-eskolár 18 iha Covalima hala’o serimónia graduasaun dahuluk ba estudante sira hamutuk na’in-416, kuarta (30/11). Imajen Tatoli/Celestina Teles.

“Ha’u hato’o agradesimentu ba manorin sira ne’ebé loron ida ohin ita hala’o istória dahuluk, ita bele realiza serimónia graduasaun ba ita-nia oan sira iha pre-eskolár ho totál estudante hamutuk  400-resin. Parabéns ba ita hotu,” Francisco de Andrade hateten liuhosi diskursu bainhira partisipa iha serimónia graduasaun estudante ensinu pre-eskolár, iha salaun EGP Suai.

Autoridade ne’e hato’o parabens ba manorin ne’ebé fó-hanorin estudante pre-eskolár ne’e la fasil tanba sira sai hanesan aman ho inan iha eskola, maibé ohin loron ho sira bele lori labarik sira simu graduasaun.

“Razaun ha’u hato’o parabéns tanba sai profesora ba estudante pre-eskolár la’ós fasil maibé defisil tebes tanba hanesan aman ho inan, ho nune’e ohin susesu boot ida katak Covalima mós bele hala’o graduasaun ba estudante ho númeru ne’ebé boot. Nune’e,  ba futuru tenke esforsu nafatin tanba labarik sira mak futuru ba nasaun.” nia dehan.

Tanba, tuir nia, dukasaun mak sai xave ba buat hotu tanba bainhira esnsinu pre-eskolár mak la forte, entaun ensinu báziku mós la forte tanba iha Timor-Leste ne’e iha mós lalehan no infernu, tanba ema hotu utiliza telemovel hodi la aproveita atu estuda maibé apreende fali buat seluk.

Tanba ne’e, nia husu ba inan-aman sira atu tuir nafatin oan sira, nune’e oan sira bele tuir dalan ne’ebé loos tanba balun agora la’o sala dalan, nune’e inan-aman sira tenke hatudu dalan loos ba oan sira.

Estudante sira hamutuk ho profesór durante oras rua (2) nia laran maibé hamutuk ho inan-aman mak barak liu, tanba ne’e edukasaun hosi inan-aman importante ba sira-nia futuru.

Tuir relatóriu, kada ensinu pre-eskolár ho totál alunu mínimu tebes, tanba ne’e husu ba autoridade lokál sira halo kolaborasaun di’ak nune’e ba futuru númeru estudante pre-eskolár bele aumenta.

Diretór Servisu Edukasaun Munisípiu Covalima, Rui Amaral Suri Seran, informa inan-aman sira seidauk tau importánsia lori oan sira rejistu iha eskola pre-eskolár, atu labarik sira bele apreende ho di’ak turi sira-nia idade.

“Ita-haree inan-aman sira seidauk tau importánsia lori ita-nia oan sira apreende iha pre-eskolár, hodi nune’e bainhira nia to’o ona ensinu báziku ladun susar ona, tanba nia apreende ona iha eskola pre-eskolár,” nia hateten.

Diretór ne’e mós apela ba inan-aman sira iha munisípiu Covalima, atu lori oan sira-ne’ebé ho idade mínimu tinan tolu (3) no másimu tinan lima (5) hakbesik ba ensinu pre-eskolár hodi rejistu sira-nia oan eskola iha pre-eskolár ne’ebé eziste ona iha suku no aldeia sira.

“Ha’u apela ba inan-aman sira hotu iha Covalima, favór lori ita nia-oan sira hosi tinan tolu (3) to’o tinan lima (5) ba rejistu iha pre-eskolar ne’ebé mak eziste ona iha ita-nia aldeia ka suku,” nia dehan.

Koordenadora Jerál pre-eskolár Covalima, Irene de Jesus Boe, informa iha serimónia graduasaun ba estudante pre-eskolár sira foin realiza dahuluk iha tinan 2022 ne’e ho númeru estudante 416 ne’ebé mai hosi eskola ensinu pre-eskolár 18.

“Durante prosesu aprendizajen, professor sira hasoru difikuldade tanba menus materia. Barak liu ba ami atu uza materiá didátiku oinsá profesora sira atu halo preparasaun bainhira hanorin,” nia esplika.

Maske foin hala’o serimónia graduasaun dahuluk ba estudante pre-eskolár, maibé durante ne’e númeru estudante pre-eskolár iha Covalima sei mínimu, tanba ne’e koordenadora ho profesór sira sei halo esforsu makaas.

“Nudar koordenadora maske durante ne’e númeru estudante iha eskola pre-eskolár sei mínimu maibé ha’u prontu atu organiza profesór sira, nune’e ba futuru bainhira hala’o serimónia graduasaun bele aumenta númeru,” nia hateten.

Tuir dadus, estudante pre-eskolár ne’ebé hala’o graduasaun ne’e estudante hamutuk na’in-416 ne’ebé mai hosi ensinu pre-eskolár 18 mak hanesan eskola pre-eskolár (EPE) Naroman ne’e estudante na’in-48, Salele na’in-42, Wematan na’in- 33 no Camelin na’in-33.

Ensinu Pre-Eskolár Fatumea ho estduante na’in-19, Wedare na’in-14,  Casabauk na’in-sia (9), Ogues na’in-11, Has  Ain na’in-sia (9),  Holbelis na’in-19, Camanasa na’in-19,  Suai Loro na’in-19 , Sukabilaran na’in-11, Busakukun na’in-12, Wetaba na’in-10, Talioan na’in-hitu (7), Akar Laran na’in-hitu (7), Babu Sinuk na’in-13.

Jornalista : Celestina Teles

Editór   : Cancio Ximenes

iklan
iklan

Leave a Reply

iklan
error: Content is protected !!