DILI, 30 novembru 2022 (TATOLI)—Ministériu Ensinu Superiór Siénsia no Kultura (MESSK) halo hela prosesu verifikasaun dadus ba estudante finalista hamutuk 627 hosi Universidade Dili (UNDIL), ne’ebé sei gradua iha semana datoluk dezembru tinan ne’e.
“Ita submete ona lista estudante hotu ba MESSK no oras ne’e sei iha hela prosesu verifikasaun nia laran. Ita hein de’it kuandu públika ona iha Jornál Repúblika, ita bele realiza ona graduasaun. Loron graduasaun nian ita termina ona ba semana datoluk fulan-dezembru tinan ida-ne’e,” Vise-Reitór I ne’ebé trata asuntu akadémiku hosi UNDIL, Francisco Martins da Silva, hateten ba Agência Tatoli, iha ninia knaar fatin, UNDIL, Mascarinhas, kuarta ne’e.
Notísia relevante: MESSK haruka fila relatóriu pagamentu propina UNTL no UNDIL
Tuir Vise-Reitór I, prosesu graduasaun iha UNDIL la’o hanesan baibain ona, ne’ebé universidade loke ba estudante finalista hotu ne’ebé ramata ona sira-nia monografia bele mai kompleta prosesu administrasaun, hafoin maka universidade submete naran finalista ba MESSK hodi verifika.
“Bainhira ramata halo verifikasaun maka sei anunsia naran graduadu sira liuhosi despaisu ministeriál, hafoin sei públika iha Jornál Repúblika maka universidade foin hetan lisensa hodi realiza serimónia graduasaun,” nia akresenta.
Estudante ne’ebé sei simu graduasaun mai hosi fakuldade neen hanesan polítika, direitu, edukasaun, ekonomia, enjeñaria no fakuldade saúde.
Enkuantu, estudante UNDIL ativu hamutuk 3.600 no tuir planu ba tinan ne’e sei loke tan prosesu inskrisaun ba estudante foun ho kuota 2.000 resin.
Jornalista : Tomé Amado
Editora : Julia Chatarina
