iklan

EDUKASAUN, COVALIMA, POLÍTIKA

CNE hala’o edukasaun sívika kona-ba eleisaun parlamentár ba estudante TEKVO Covalima

CNE hala’o edukasaun sívika kona-ba eleisaun parlamentár ba estudante TEKVO Covalima

Estudante Ensinu Tékniku Vokasionál Cristal Covalima partisipa iha programa edukasaun sívika hodi Komisaun Nasionál Eleisaun (CNE, sigla portugés) kona-ba eleisaun parlamentár 2023, kinta (01/12). Imajen Tatoli/Celestina Teles.

COVALIMA, 01 dezembru 2022 (TATOLI)–Komisaun Nasionál Eleisaun (CNE, sigla portugés) realiza edukasaun sívika kona-ba eleisaun parlamentár ba estudante sira iha ensinu Tékniku Vokasionál (TEKVO) Cristál iha munisípiu Covalima.

“Komisaun Nasionál ba Eleisaun (CNE, sigla portugés) realiza edukasaun sívika ne’e atu hala’o movimentu sensibilizasaun ba iha konsensializasaun. Ha’u hakarak esplika kona-ba movimentu konsensializasaun hanesan, ita-nia lei obriga de’it sidadaun ne’ebé atinje ona ho idade 16 atu sai hanesan eleitór. Iha artigu 65 konstituisuan RDTL obrigatoriu atu tuir rezensiamentu eleitorál  maibé bainhira to’o iha loron votasaun ita-nia lei la obriga eleitór sira atu vota iha loron votasaun,” Komisáriu CNE destakadu iha Aileu no Covalima, Carlitos Martins, hateten ba jornalista sira iha eskola sekundária tékniku vokasionál Cristal Covalima, kinta ne’e.

CNE hala’o edukasaun sívika ne’e ho objetivu prisipál atu sensibiliza eleitór sira-ne’ebé resensiadu, nune’e sira bele iha konxiénsia atu bele hola parte iha prosesu eleisaun, eleitór sira partisipa iha loron votasaun hanesan eleitór sira partisipa ona prosesu dezenvolvimentu nasionál.

CNE hanesan órgaun administrasaun eleitorál iha obrigasaun atu realiza programa edukasaun sívika ba sidadaun hotu liu-liu sidadaun sira-ne’ebé nia idade atinje ona 16 atu tama ba 17 hodi bele ezerse sira-nia direitu atu vota.

“Matéria ne’ebé mak ita-nia fasilitadór sira prepara mak ita ko’alia kona-ba sidadania, direitu sidadaun atu tuir vota no mós matéria lubuk ida relasiona ho edukasaun sívika ida-ne’e,” nia dehan.

Substánsia hosi programa ida-ne’e hodi hasa’e eleitór sira-nia koxiénsia hodi bele hola parte iha loron votasaun programa edukasaun sívika ida-ne’e iha ámbitu atu realiza eleisaun parlamentár  iha tinan 2023.

Komandante eskuadra Maucatar, Sarjento Xefe Anacleto da Costa, reforsa CNE realiza edukasaun sívika ba estudante sira ho tema “Ha’u sente lakon no moe bainhira ha’u la ba vota” hanesan sadik estudante sira ho idade 17 atu ezerse sira-nai direitu votu iha eleisaun tuir mai.

“Haree ba tema ne’ebé ohin ita hotu asiste ho tema “Ha’u sente lakon no moe bainhira ha’u la ba vota”, ida-ne’e hanesan atu sadik ita-boot sira-ne’ebé atinje ona tinan 17 ne’e oinsá ba ezerse direitu votu hodi lori nasaun ba iha progresu ne’ebé di’ak. Ami hanesan sai sasin ba ita-boot sira, ami esprera katak lori nasaun ba ne’ebe no to’o iha ne’ebé ami hein nia rezultadu,” nia informa.

Entretantu, ko’alia kona-ba seguransa hahú kedas iha uma laran bainhira iha uma sente seguru, la’o tuir estrada mós sente seguru to’o iha eskola fatin.

“Seguransa tenke tau iha ita-nia fuan no laran. Se seguransa ita la kuda iha ita-nia fuan ho laran, signifika odiu vingansa iha ita-nia kakutak entaun topiku ohin loron ne’e sentidu ba ita-boot sira. Tanba ne’e, nu’udar estudante tenke kuda nasionalizmu no patriotizmu hodi hadomi malu nu’udar família,” nia hateten.

Reprezentante Estudante hosi Ensinu Tékniku Vokasionál Cristal Covalima, Novia Lives Fernandes, hato’o agradesimentu ba Komisaun Nasionál Eleisaun (CNE, sigla portugés) realiza edukasaun sívika iha ninia eskola fatin liu-liu kona-ba preparasaun atu hasoru eleisaun parlamentár 2023.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!