iklan

HEADLINE, MUNISÍPIU, OÉ-CUSSE (RAEOA), SAÚDE

INCSIDA rejista kazu HIV-SIDA 1.704, Oé-Cusse okupa fatin dahaat

INCSIDA rejista kazu HIV-SIDA 1.704, Oé-Cusse okupa fatin dahaat

INCSIDA,IP, Ministériu Saúde, no Autoridade hamutuk ho parseriu nasionál no internasionál, kinta ne’e selebra loron mundiál HIV-SIDA iha Oé-Cusse Ambeno. Imajen Tatoli/ Abílio Elo Nini.

OÉ-CUSSE, 01 dezembru 2022 (TATOLI) – Prezidente Institutu Nasionál Kombate HIV-SIDA, Institutu Públiku (INCSIDA, IP), Anastasio de Jesus, informa, daudaun ne’e rejista ona kazu HIV-SIDA hamutuk 1.704.

Hosi dadus ne’e Rejiaun Administrativa Espesiál Oé-Cusse Ambeno (RAEOA) okupa fatin dahaat iha Timor-Leste ho númeru kazu 44 .

“Oras ne’e daudaun, ita-nia nasaun rejista ona kazu HIV-SIDA, ho númeru ne’ebé agora iha 1.704, maibé INCSIDA rejista mak ne’e ba 2022 nian, no espesiál ba Oé-Cusse iha 44 kazu tama iha kuatru lugár iha Timor-Leste,” Anastasio de Jesus, informa ba povu Oé-Cusse iha ámbitu komemorasaun loron mundiál HIV-SIDA, ne’ebé hala’o iha sub-rejiaun Pante Makasar, kinta ne’e.

Nune’e, INCSIDA,IP, serbisu hamutuk ho Autoridade RAEOA liuhosi Sekretáriu Rejionál ba Asuntu Saúde, daudaun ne’e realiza ona diskusaun téknika, atu oinsá realiza kampaña nasionál ba komunidade iha Oé-Cusse, nune’e bele redúz no kombate virus ne’e iha Timor-Leste.

Tanba daudaun ne’e parte INCSIDA rejista mós kazu mate hamutuk na’in-271, no mós mós kazu tratamentu hamutuk na’in-871. Númeru hirak-ne’e INCSIDA hetan mai hosi Ministériu Saúde.

Prezidente INCSIDA  afirma, iha fatór barak kontribui ba transmisaun HIV-SIDA iha Timor-Leste, dahuluk, influénsia hosi mudansa téknolojia ne’ebé fó afetasaun ba joven sira, no afeita mós ba inan-aman sira-ne’ebé ho idade produtivu.

Fatór daruak, maka nesesidade ekonomia iha família mínimu, entaun oan feto no inan sira, lori isin hanesan serbisu garantidu ba sira-nia aan rasik, nune’e atividade prostituisaun online komesa buras.

“Atividade hirak ne’e eziste mós iha ita-nia rai, iha institutu públiku no mós iha institutu privadu, entaun hahalok sira-ne’e fó influénsia maka’as tebes atu hada’et virus ba ema seluk,” nia hateten.

Fatór seluk, maka ita-nia konsiénsia no koñesimentu mínimu tebes, dala barak ema hatene hela maibé kontinua prátika no halo nafatin, ida-ne’e sai problema boot ida iha Timor-Leste.

Prezidente Autoridade RAEOA Arsénio Paixão Bano, hatete, nu’udar Oé-Cusse tenke rekoñese kazu ne’e iha Oé-Cusse.

Nia parte sei koordena ho serbisu saúde rejionál atu realiza kampaña sensibilizasaun ba ba populasaun ho entidante tomak atu hamutuk kontribui hodi redús kazu ne’e.

“Tanba ita okupa fatin haat entre munisipíu tolu ho kapitál Dili, distritu tolu kazu distritu fronteira ho ita, Suai, Maliana no Oé-Cusse, ne’e fronteira haleu, hosi kazu 44 ne’e iha ona ema mate, balu sei iha hela tratamentu, ha’u husu ita hotu idak-idak tenke responsabilidade ba Oé-Cusse, atu salva uluk família uma laran, signifika salva ona povu Oé-Cusse no salva mós Timor-Leste hosi virus ne’e,’ nia afirma.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!