iklan

COVALIMA, POLÍTIKA

KFP partilla valór inkluzaun igualdade jéneru ba autoridade munisípiu 12 iha Covalima

KFP partilla valór inkluzaun igualdade jéneru ba autoridade munisípiu 12 iha Covalima

Autoridade hosi munisípiu 12 no kargu xefia sira partisipa iha workshop ho tema “Lideransa inkluziva e integrada Caminharemos a uma administração Pública eficas, eficiente participativo e incluzivo” ne’ebé Komisaun Funsaun Públika (KFP) realiza iha salaun EGP Suai. Imajen Tatoli/Celestina Teles.

COVALIMA, 01 dezembru 2022 (TATOLI)–Komisaun Funsaun Públika (KFP) realiza workshop ho tema “Lideransa inkluziva e integrada Caminharemos a uma administração Pública eficas, eficiente participativo e incluzivo” ba administrasaun públika, kargu xefia no autoridade hosi munisípiu 12 iha Covalima.  

KFP realiza workshop ne’e ho objetivu atu partilla esperiénsia baze legál importánsia valór inkluzaun igualdade jéneru ba jerente administrasaun públika sira.

“Ohin ita hamutuk iha ne’e ho oradór lubuk-ida partila esperiénsia, hodi hatutan ba malu kona-ba lei sira-ne’ebé ligadu ho kestaun importánsia promosaun valór inkluzaun no igualdade jenéru, iha administrasaun públika. Oinsá mak bele sensibiliza liután partisipante sira kestaun atu tau konsiderasaun no atensaun aas ba aspetu asuntu inkluzaun no jenéru iha administrasaun públika,” Komisaun Funsaun Públka (KFP), Faustino Cardoso Gomes hateten ba Agência Tatoli, iha salaun EGP Suai, kinta ne’e.

Ho nune’e, nia dehan, atu tau konsiderasaun hahú hosi kestaun rekrutamentu nomeasaun no kontratadu tantu ba ajente administrasaun públika no mós ba kazuál sira, atu tau kuota balun ne’ebé komisaun define ona iha-nia orientasaun para aleinde ezijénsia legál ne’ebé iha ona.

KFP realiza Workshop ida-ne’e hanesan parte atividade ida, hosi planu asaun anuál KFP sempre hala’o kada tinan, maibé ba tinan ne’e KFP deside hala’o iha Covalima ho hanoin lori dirijente  administrasaun públika hahu hosi posizaun kiik no aas ne’e informadu tuir politika ne’ebé iha

Maske lider administrasaun públika sira hatene ona maibé presiza atu hametin liután sira-nia koñesimentu no atualiza ba sira progresu polítiku sira-ne’ebé KFP hamosu liu-liu orientasaun ligadu ho realizasaun valór inkluzaun iha administrasaun públika.

Workshop ne’e hala’o durante loron rua ne’ebé hahú iha kinta (01/12) parte dadeer, oradór dahuluk Sekretária Ezekutiva KFP, Maria da Costa Oliveira, aprezenta matéria panorama jerál feto iha funsaun públika.

Oradór daruak, Asesór Jurídiku husik KFP, Afonso Soares, aprezenta matéria orientasaun lei númeru 30/2022 kona-ba orientasaun tranzisaun kargu no novu titulár.

Oradór ba datoluk, Prezidente KFP, Faustino Cardoso Gomes, aprezenta polítika no prioridade KFP mandatu ba administrasaun públika timorense.

Oradór dahaat, hosi UN Women Country reprezentante hosi Timor-Leste aprezenta kona-ba importánsia ba promosaun partisipasaun no lideransa feto no ema ho difisiénsia iha vida polítika.

Iha parte loro-kraik, oradór hosi ILO aprezenta kona-ba papél feto ema ho defisiénsia iha konstrusaun Estadu, Provedora Direitu Umanu no Justisa (PDHJ) ko’alia kona-ba promosaun igualdade jéneru no ema ho defisiénsia tuir perpetiva direitu umanu ba justisa iha Timor-Leste.

Jestora Programa Raes Hadomi Timor-Oan (RHTO), Silvia Soares, aprezenta kona-ba servisu iha advokasia ba ema ho defisiénsia iha vida públika.

Diretór Nasional Promosaun Direitu Umanu ba Ema ho Defisiénsia, Mateus da Silva, aprezenta esperiénsia servisu liga ho polítika sira mak iha no ninia implementasaun iha ámbitu promosaun direitu ba ema ho defisiénsia.

Xefe Departamentu Edukasuan Inkluzivu Ministériu Edukasaun Juventude no Desportu (MEJD), aprezenta esperiénsia nu’udar ema ho defisiénsia nia partisipasaun nu’udar lideransa iha kareira administrasaun públika.

Workshop ba loron daruak, iha sesta (02/12), oradór Diretór Jerál Sekretária Estadu Igualdade no Inkluzaun (SEII), Armando da Costa, aprezenta polítika no príoridade VIII Governu KOnstitusionál nian ba empoderamentu feto no Ema ho Defisiénsia (EhD).

Nune’e mós, oradór Diretora Ezekutiva Institutu Nasionál Seguransa Sosiál (INSS), Aida Mota, aprezenta esperiénsia nu’udar feto iha kareira iha administrasaun públika.

Reprezentante Administradór munisípiu Covalima, Francisco de Jesus Alves, hateten Komisaun Funasaun Públika realiza workshop nivél nasionál iha munisípiu Covalima ne’ebé envolve hosi jerente instituisaun sira hotu.

“Workshop nivel nasional ida-ne’e organiza hosi Komisaun Funsaun Públika (KFP) dirije hosi Prezidente KFP rasik hodi realiza workshop iha munisípiu Covalima ne’ebé envolve jerente instituisaun sira hotu,” nia hateten.

Jornalista : Celestina Teles

Editór        : Cancio Ximenes

iklan
iklan

Leave a Reply

iklan
error: Content is protected !!