OÉ-CUSSE, 01 dezembru 2022 (TATOLI) – Institutu Nasionál Kombate HIV-SIDA, Institutu Públiku (INCSIDA,IP), Ministériu Saúde (MS) no Autoridade Rejiaun Administrativa Espesiál Oé-Cusse Ambeno (RAEOA) hamutuk ho paraseriu nasional no internasional sira, kinta ne’e selebra loron mundiál HIV-SIDA iha rejiaun Oé-Cusse Ambeno.
Selebrasaun loron mundiál ba tinan ne’e ho tema, ‘Garante Asesu Promosaun, Prevensaun no Kuidadu Diagnóstika Tratamentu HIV-SIDA ba Ema hotu’.
Iha biban ne’e, Prezidente INCSIDA, Anastasio de Jesus, informa, objetivu hosi selebrasaun ne’e, atu konsolida no inspira ema hotu hodi kontinua luta nafatin kontra kazu HIV-SIDA iha Timor-Leste, liuhosi apoiu entidade sira hotu tantu Estadu no Governu, no labele diskrimina vítima sira, maibé apoiu no inspira sira bele asesu ba atividade sira iha Timor-leste.
Nia husu apoiu hosi relijioza, sosiedade sivíl, seguransa, organizasaun foinsa’e, líder komunitáriu ho entidade relevante sira atu hamutuk luta kontra transmisaun virus HIV-SIDA, atu oinsá inspira ema hotu hodi redús stigma diskriminasaun ba Timor-aon sira-ne’ebé maka sofre hela ho moras HIV-SIDA.
“Ohin selebra loron mundiál HIV-SIDA hamutuk ho povu Oé-Cusse, ho hanoin hanesan katak, ita atu konsolida ema hotu, hanoin hamutuk oinsá maka virus HIV-SIDA ita bele minimiza iha Timor-Leste, ita la kombate maibé minimiza ninia maneira da’et ba ema seluk,” Anastasio de Jesus, ko’alia iha selebrasaun loron mundiál, ne’ebé hala’o iha Palaban, sub-rejiaun Pante Makasar.
Prezidente Institutu Públiku ne’e apela liuhosi komemorasaun ne’e, bele konstribui ideia konstrutivu hamutuk, hodi fó tulun ba maluk sira-ne’ebé maka sai afetadu pozitivu HIV-SIDA tanba dala barak bainhira maluk balu pozotivu ba kualkér insfesaun.
“Maibé nu’udar Prezidente INCSIDA,IP, hakarak fó hanoin ba ita hotu, katak ne’e hanesan virus ki’ik oan ida mak iha ita-nia isin, ita la presiza atu izola ka dezvia tiha sira, fó nafatin oportunidade ba sira, nune’e sira bele kompete iha atividade hot-hotu iha nasaun ne’e iha, sei ita halo sira nune’e, sira-nia problema sosiál aumenta liután,” nia fó hanoin.
Prezidente Autoridade RAEOA, Arsénio Paixão Bano, informa, antes ne’e Minsitériu Saúde, koordena Autoridade, atu sai uma na’in ba komemorasaun loron mundiál HIV-SIDA iha Oé-Cusse.
“Oé-Cusse tenke orgullu no agradese tanba Governu Sentrál hili Oé-Cusse, iha fulan ne’e vizitante barak maka mai hamutuk ho povu Oé-Cusse, entaun ita aproveita selebrasaun ne’e hodi hasa’e konsiensializasaun ba ema hotu liuliu joven sira, nune’e bele fahe tutan informasaun ne’e to’o baze atu iha koñesimentu kona-bá virus ne’e,” Arsénio Bano hateten.
Entretantu, partisipa iha selebrasaun loron mundiál HIV-SIDA ne’e mai hosi Vise-Ministra Ministériu Solidariedade Sosiál no Inkluzaun (MSSI), Vise-Ministru Administrasaun Estatál (MAE), Diretór Nasionál Ministériu Saúde (MS).
Nune’e parsériu internasionál mai hosi reprezentante WHO, no reprezentante hosi Embaxadór Estadu Unidu Amérika, no Autoridade RAEOA, estudante no populasaun sira.
Selebrasaun loron mundiál HIV-SIDA ne’e, hahú ho selebrasaun misa realiza iha iha Igreja Nossa Señora do Rosário Numbei, depois kontinua ho marsa drum band ba fatin selebrasaun. Nune’e mós realiza jogu tradisionál hanesan dada-tali sa’e-bua, inklui konsertu múzika.
Jornalista: Abílio Elo Nini
Editór: Evaristo Soares Martins
