iklan

EDUKASAUN, HEADLINE

MESSK seidauk finaliza verifikasaun lista graduadu 393 hosi UNITAL

MESSK seidauk finaliza verifikasaun lista graduadu 393 hosi UNITAL

Logotipu UNITAL. Imajen/Espesiál

DILI, 01 dezembru 2022 (TATOLI)–Universidade Orientál Timor-Lorosa’e (UNITAL) seidauk deside data realiza serimónia graduasaun ba estudante finalista 393 nian tanba Ministériu Ensinu Superiór Siénsia no Kultura (MESSK) seidauk finaliza prosesu verifikasaun lista estudante sira.

Reitór UNITAL, Florindo Pereira, hateten, Konsellu Reitoria deside ona katak graduasaun sei realiza iha dezembru, maibé sei hein desizaun hosi ministériu.

“Ami submete ona lista estudante graduadu 393 ba Ministériu Ensinu Superiór Siénsia no Kultura hodi halo prosesu verifikasaun. Ami hein de’it, bainhira ramata no ministériu hatún ona despaisu no públika ona lista graduadu sira nia iha Jornál Repúblika maka ami foin deside kalendáriu fiksu ba graduasaun nian,” Reitór informa ba Agência Tatoli, iha ninia knaar fatin kampus UNITAL, Becora, kinta ne’e.

Notísia relevante: Estudante Bolsa Hakbiit 95 integra ona iha UNITAL

Estudante finalista sira ne’ebé preparadu simu graduasaun, kompostu hosi fakuldade hitu hanesan fispol, saúde, edukasaun, diretu, enjeñaria, agrikultura, no ekonomia inklui kursu 35.

“Entre fakuldade hitu ne’ebé eziste, iha fakuldade lima maka finaliza ona sira-nia prosesu judisium, enkuantu fakuldade fispol no diretu foin atu realiza judisium iha loron 02 dezembru 2022,” nia akresenta.

Estudante ein jerál ne’ebé ativu iha UNITAL hamutuk 8.000 resin no parte universidade iha ona planu ba tinan akadémiku 2023 atu loke tan prosesu rekrutamentu ba estudante foun hamutuk 2.000 resin tanba iha ona fasilidade sala aula sufisiente atu akumula estudante liu númeru ne’ebé deside ona.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!