iklan

EDUKASAUN, HEADLINE

Profesór apoiu atividade iha SKA preokupa ho estatutu

Profesór apoiu atividade iha SKA preokupa ho estatutu

Diretór Nasionál Ensinu Rekorrente, Quintão da Costa Massa. Imajen Tatoli/Tomé Amado

DILI, 01 dezembru 2022 (TATOLI)–Diretór Nasionál Ensinu Rekorrente (DNER), Quintão da Costa Massa, sei konvida Komisaun Nasionál Timor-Leste ba UNESCO (KNTLU) atu haree filafali akordu kontratu ne’ebé halo ona iha pasadu tanba profesór kontratadu apoiu prosesu ensinu aprendizajen iha sentru komunitária aprendizajen (SKA) barak maka hahú dúvida ho estatutu.

“Ita halo ona konfirmasaun ho komisaun kona-ba akordu rekrutamentu ba profesór sira, ne’ebé hahú dezembru to’o janeiru molok tama tinan letivu foun ami ho komisaun tenke halo fali avaliasaun atu haree akordu ne’e atu labele halo profesór sira ne’ebé hetan ona kontratu hosi diresaun rua ne’e dúvida fali,” Diretór hato’o asuntu ne’e ba Agência Tatoli, iha salaun DNER, Vila Verde, kinta ne’e.

Tuir Dirijente, parte rua presiza tuur hamutuk hodi halo avaliasaun foun kona-ba papél atividade ensinu rekorrente, ne’ebé haree liu ba responsabilidade atu halo rekrutamentu ba profesór sira.

“Bainhira komisaun mak halo karik ninia finalidade ne’e atu ba loos ne’ebé tanba iha terrenu profesór barak ne’ebé komisaun rekruta komesa preokupa ona ho sira-nia estatutu,” nia akresenta.

Notísia relevante: KNTL-UNESCO apoiu fundu harii Sentru Aprendizajen Komunitária tolu

Profesór kontratadu ne’ebé DNER rekruta ona hodi apoiu atividade ensinu aprendizajen iha SKA ne’ebé estabelese iha munisípiu sia hamutuk 45, maibé to’o agora diresaun seidauk simu relatóriu hosi komisaun, tanba ne’e profesór sira tau kestaun katak prosesu rekrutamentu ne’e parte rua maka halo.

“Haree ba preokupasaun sira ne’e, maka diresaun buka hadi’a iha tinan letivu foun atu labele repete tan iha futuru. Tanba daudaun ne’e diresaun halo ona kontratu ho profesór sira atu apoiu atividade iha sentru komunitária aprendizajen nian. Agora komisaun mós rekruta tan, la hatene loos ba futuru misaun komisaun nia ramata otomatikamente profesór sira ne’e sei submete mai diresaun, maibé karik diresaun la simu profesór sira ho razaun tanba la hatene, entaun profesór sira atu ba loos ne’ebé,” nia tenik.

Aleinde ne’e, Diretór konsidera, Diretór munisipál sira ho estrutura SKA sira iha baze laiha liña komunikasaun no entendimentu ba malu. Atividade ne’ebé komisaun realiza mai hosi diresaun maibé kondisaun mosu oin seluk, hodi dehan atividade ekivalénsia ne’e DNER nian no atividade apoiu SKA ne’e KNTLU nian.

Loloos atividade SKA ne’ebé komisaun apoiu ne’e atu fasilita programa ALFANAMOR no ALFANATIL ka ALFABETIZAUN hosi atividade ekivalénsia nível primária no sekundária nian, tanba ne’e hanesan ema ne’ebé iha responsabilidade másimu sente prejudikadu.

“Ha’u atu foti desizaun hodi trava atividade ne’e mós labele, ha’u halo fali mós ha’u sala tanba akordu la’o ona no interpretasaun iha terrenu mós sala tiha ona, maibé ha’u husu de’it ba entidade hotu atu haree ho diferente interpretasaun ba ezekusaun programa ne’e, atu oinsá maka informasaun ne’e bele uniforme, nune’e públiku bele hatene ho loloos katak programa ne’e diresaun nian,” nia esplika.

Diretór dehan, diresaun bele hatene ninia responsabilidade to’o iha ne’ebé tanba atividade SKA ne’e DNER nian, tanba ne’e responsável programa ne’e rua labele entidade rua, ezemplu prosesu rekrutamentu profesór voluntáriu hodi apoiu atividade ensinu aprendizajen iha SKA sira.

“Asuntu analfabetu ne’e loron ida sei hotu, ne’ebé profesór sira ne’ebé komisaun rekruta hodi apoiu programa sei la eziste, tanba sira hetan kontratu temporária. Tempu analfabetu ne’e hotu sira nia kontratu mós hotu, maibé atividade ba ekivalénsia ne’e nunka hotu, liu-liu ekivalénsia ba nível sekundária nian,” nia salienta.

DNER sei buka maneira atu haree filafali akordu serbisu diresaun ho parseiru sira sei relevante ka lae ho situasaun ohin loron nian, tanba akordu uluk ne’e la’o to’o de’it atividade analfabetizasaun, maibé ekivalénsia seidauk iha. Enkuantu ko’alia kona-ba alfabetizasaun ne’e maka depois muda naran ba ALFANAMOR no ALFANATIL maibé nafatin analfabetu.

DNER durante ne’e hala’o hela atividade ekivalénsia iha territóriu nasionál maibé mosu dezentendimentu iha baze, ne’ebé konsidera nu’udar falla iha komunikasaun tanba atividade ne’ebé la’o daudaun ne’e iha entidade rua maka hala’o.

Jornalista   : Tomé Amado   

Editora        : Julia Chatarina

iklan
iklan

One Comment

  1. Kada Durasaun la hatene ida idak nia knaar ho loloos, maka wainhira hala’o funsaun atendemento sempre hadau malu, no wainhira mosu problema tenke hatudu liman ba malu.

Leave a Reply

iklan
error: Content is protected !!