iklan

HEADLINE, SAÚDE

Scaling Up Nutrition ho liña ministerál diskute asaun kombate má nutrisaun

Scaling Up Nutrition ho liña ministerál diskute asaun kombate má nutrisaun

Koordenadór Asuntu Seguransa Ai-han no Nutrisaun Gabinete Primeiru Ministru, Filipe da Costa. Imajen TATOLI/Egas Cristóvão

DILI,01 dezembru 2022 (TATOLI)—Scaling Up Nutrition iha Timor Leste ho liña Ministeriál, kinta ne’e, realiaza semináriu nasionál hodi diskute asaun kombate má nutrisaun no inseguransa ai-han iha Timor-Leste.

Semináriu ho objetivu atu konsolida esforsu no rekursu sira atu kombate  má nutrisaun no inseguransa ai-han iha Timor-Leste.

Tanba tuir dadus katak iha 28% populasaun mundiál moris  iha inseguransa ai-han  ne’ebé  moderadu  no 22% labarik sira iha mundu  tinan lima mai kraik raes badak.

“Tuir dadus husi tinan 2020 hosi Ministériu Saúde hatudu katak ita nafatin problema ba asuntu má nutrisaun, no ita presiza tau atensaun tanba labarik tinan lima mai kraik 47% raes badak. Iha Timor laran tomak ita haree hanesan munisípiu Ermera labarik sira raes badak hamutuk 63%, Ainaro 60%, Oé-cusse 57%”, dehan Koordenadór Asuntu Seguransa Ai-han no Nutrisaun  Gabinete Primeiru Ministru, Filipe  da Costa ba jornalista sira iha Otél-Timor.

Kona-ba anemia, nia informa iha nivel nasionál labarik sira tinan lima mai kraik hamutuk 40% no munisípiu aas liu mak Liquiça 61%, Manatuto 49%, inklui Ainaro no Covalima 46%.

Alende ne’e, inan feton sira ne’ebé mak sofre anemia iha 23%, maske mediu hela, maibé ita tenke preokupa tanba munisípiu sira ne’ebé aas liu  mak Oé-cusse 36%, Baucau 30%, no Dili 27%.

“Ami hamutuk ho sosiedade sivil, parseiru dezenvolvimentu sira no Governu oinsá atu rezolve situasaun ida ne’e iha ita nia rai”.

Iha fatin hanesan, Ministra Saúde, Odete Maria Freitas Belo, informa durante ne’e Ministériu Saúde servisu hamutuk ho parseiru sira atu kombate má nutrisaun iha Timor Leste.

“Iha tinan 2016 no 2017, ita nia maluk má nutrisaun sa’e ba 57%, maibé iha 2020 ita konsege redús ba iha 47%, nune’e servisu ida ne’e mak ami halo hamutuk ho parseiru dezenvolvimentu sira hodi kombate má nutrisaun iha ita nia rain,” nia reforsa.

Jornalista : Felicidade Ximenes

Editór       : Florencio Miranda Ximenes

iklan
iklan

Leave a Reply

iklan
error: Content is protected !!