iklan

HEADLINE, MUNISÍPIU, VIQUEQUE

Joven sira hetan rendimentu iha ponte Buanurak Viqueque

Joven sira hetan rendimentu iha ponte Buanurak Viqueque

Joven sira lori motór hakat mota tanba ponte Baunurak kotu, segunda (28/11). Imajen Tatoli/Vitorino Lopes da Costa

VIQUEQUE, 02 dezembru 2022 (TATOLI)–Ponte Buanurak baliza entre postu Ossu no postu Viqueque Vila, ne’ebé kotu iha domingu (27/11) maizumentu tuku 11:20, maski fó impaktu ba movimentu ema no transporte maibé fó benefísiu ba joven sira.

Joven iha área Buanurak, António da Silva, haktuir, joven sira hetan osan liuhosi ajuda pasajeiru sira hit motor ba mota sorin.

“Ponte ne’e kotu ami sente fó benefísiu ba ami, kada loron ami hit motór ba mota sorin ema selu ami. Ida-ne’e sai hanesan serbisu ida ba ami ne’ebé durante ne’e laiha serbisu,” António da Silva, hateten ba Agência Tatoli, iha mota Buanurak, sesta ne’e.

Serbisu ne’e la’o ona kuaze loron-haat, ne’ebé kada loron ema sempre halo movimentu no bainhira joven sira ajuda hit motór boot, pasajeiru sira selu $10, enkuantu motor kiik $5.

“Ami la’ós hiit de’it motor, ami mós ajuda komunidade hanesan lalin sasán no dada komunidade ba mota sorin. Ida-ne’e depende komunidade hanoin mak fó, dala ruma $1 hanesan ne’e ami simu de’it,” nia akresenta.

Notísia relevante: MOP Viqueque komunika ona parte nasionál rezolve ponte Baunurak kotu

Joven sira fahe tempu no grupu rua, ne’ebé ohin grupu ida maka tama hit motór no lalin sasán, aban fali grupu ida mak tama hodi troka malu atu hetan osan hotu.

“Ami hit motór to’o kalan, másimu loron ida  ami hetan $500. Kalan tuku 20:00 hanesan ne’e ami fila ba uma maka fahe osan ba malu,” nia tenik.

Tuir observasaun Agência Tatoli iha mota Buanurak, nota katak, empreza COVEC loke ona dalan alternativu, maibé motór sira kontinua labele liu tanba mota kontinua tun.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!