DILI, 02 dezembru 2022 (TATOLI)— Komandu FALINTIL-Forsa Defeza Timor-Leste (F-FDTL) ho Defense Cooperation Program (DCP) hosi Militár Austrália, sesta ne’e, hala’o enseramentu ba formasaun dahuluk ba membru militár nain-120 hodi hala’o ka apoia misaun pás ba Organizasaun Nasaun Unidu (ONU).
Formador ba kapasitasaun ne’e mai hosi militár Austrália no militár Timor-Leste ne’ebé hanaran Mobile Training Team (MTT) ne’ebé hala’o formasaun durante fulan neen, hahú iha loron 23 maiu to’o dezembru 2022 iha sentru Instrusaun Nicolau Lobato-Metinaro.
“Ohin, ita halo enseramentu ba formasaun ne’e. Ita hanesan membru Nasaun Unida (ONU) ne’e kapasitasaun importante ba militár F-FDTL karik ba futuru presiza sira ba halo misaun pás bele iha koñesimentu ona”, Diretór Operasaun Apoia ba Pás iha F-FDTL, Majór Infantaria David Leopoldo dos Reis Santos, hateten ba jornalista sira.
Iha formasaun ne’e, nia dehan foku ba área asisténsia umanitáriu no protesaun sivil no kestaun balun ne’ebé liga ba serbisu misaun pás Organizasaun Nasaun Unidu (ONU) nian.
Komandu F-FDTL sei kontinua nafatin formasaun ne’e iha tinan oin hodi foku fali ba lingua hanesan portugés no inglés tanba atu hala’o misaun pás presiza hatene língua hirak ne’e.
“Iha formasaun dahuluk hetan difikuldade liuliu ba fasilidade ne’ebé uza atu halo prátika, maibé hanesan militár la hamate espiritu aprende nian no militár nain-120 bele finaliza sira nian kursu ho di’ak”, katak nian.
Iha fatin hanesan, Reprezentante Defense Cooperation Program (DCP), Majór Mark Slavin, hateten Austrália kompromete hodi apoia militár timoroan iha kapasitasaun iha área misaun ba pás nian.
“Ba oin liuhosi kooperasaun DCP Austrália kontinua apoia F-FDTL atu fó formasaun iha área asisténsia umanitária no kapasita membru sira ho lian inglés, nune’e iha futuru membru F-FDTL sira hetan responsavél ba halo misaun ba pás bele la’o ho di’ak”, katak.
Entertantu, Reprezentante Xefe Estadu Maiór Jenerál FALITIL Forsa Defeza Timor-Leste (F-FDTL), Koronél Sadiak Resik Laek, husu ba membru F-FDTL sira atu aproveita oportunidade ne’e ho di’ak.
“Husu ba ita sira buka aprende no aprende nafatin hodi hakle’an ita bo’ot sira koñesimentu tanba misaun pás ne’e la’os buat fasil ita tenke iha koñesimentu”, nia enkoraja.
Jornalista: Natalino Costa
Editór : Florencio Miranda Ximenes
