iklan

DILI, POLÍTIKA

Membru RENETIL hatudu sensibilidade kontribui liberta povu ba moris di’ak

Membru RENETIL hatudu sensibilidade kontribui liberta povu ba moris di’ak

Preidente Parlamentu Nasional, Aniceto Guterres Lopes, Imajen Tatoli/Antonio Goncalves

DILI, 02 dezembru 2022 (TATOLI)—Prezidente Parlamentu Nasionál, Aniceto Longuinhos Guterres Lopes, apela ba kuadru no membru Resistência Nacional dos Estudantes Timor-Leste (RENETIL) hotu atu hatudu sensibilidade kontribui liután iha prosesu dezenvolvimentu nasaun hodi liberta povu ba moris di’ak.

Notísia Relevante: Saudozo Lucas Rama Metan realiza ona mehi RENETIL

“Lori Estadu nia naran hato’o votu susesu ba kongresu ne’e no nu’udar  Prezidente Parlamentu Nasionál atu halo abertura ba kongresu ida-ne’e ha’u apela ba kuadru no membru RENETIL sira hotu atu hatudu nia sensibilidade tomak hodi kontribui nafatin no kontribui di’ak liután hodi hasoru dezafiu sira-ne’ebé Estadu iha,” Prezidente PN ne’e hateten liuhosi diskursu bainhira halo abertura ba kongresu RENETIL ba dala-VIII (2022) ho tema “Hametin RENETIL hodi kontribui ba hametin Estadu” iha Sentru Konvensaun Dili (CCD, sigla portugés), Merkadu Lama, sesta ne’e.

RENETIL nu’udar organizasaun polítika partidária presiza halo polítika ho kualidade patriótiku liután, membru sira sai polítiku ho kualidade patriótiku no bainhira membru ida hola opsaun partidária normalmente no bele kontribui di’akliu ba partidu polítiku ne’ebé nia pertense hodi hametin Estadu no konkretiza libertasaun povu.

Liu hosi dalan ida-ne’e, RENETIL bele kontribui di’ak liután hametin Timor-Leste nu’udar Estadu direitu demokrátiku.

Tema ba kongresu ne’e nu’udar temátika ida nesesáriu atu diskute duni durante kongresu ne’e, no relevante nakloke ba pergunta sira seluk hanesan RENETIL sei metin nafatin hanesan uluk to’o agora.

“Ita-nia Repúblika metin ona nu’udar Estadu iha aspeitu polítiku, ekonómika no sosiál, nune’e saida mak RENETIL bele halo di’ak liután oinsá hodi kontribui. Ha’u fiar katak temátika ida-ne’e ho pergunta sira-ne’ebé koloka sei sai atensaun iha diskusaun kongresu husik ba kongresista sira atu diskute,” nia dehan.

Iha tempu rezisténsia, RENETIL ho duni nia papél importante tebes kontribui ba iha luta libertasaun.

Hahú hosi restaurasaun indepedénsia Timor-Leste hahú tama iha faze luta foun ho dimensaun seluk, ne’ebé se ema akompaña durante tinan 20 ida-ne’e liu-hosi prosesu ida kompleksu liután, tanba ida-ne’e mak iha dezenvolvimentu iha aspeitu hotu-hotu hodi kombate ki’ak no liberta povu ba moris di’ak.

Tinan 20 hafoin restarasaun indepedénsia, Estadu kontinua hasoru dezafiu boot liután, bainhira Timor-Leste haree tend’ensia mundu globál nian entaun kongresu ne’e nakloke atu diskute oinsá bele kontribui ba prosesu dezenvolvimentu nasaun nian.

Iha parte seluk, nu’udar militante RENETIL, Aniceto Guterres, nia parte koiñese di’ak RENETIL tanba hetan esperiénsia barak iha RENETIL hodi to’o mai iha ohin loron hola parte iha polítika no okupadu kargu polítiku.

“Ita agradese ba RENETIL no ba fundadór sira. Ita hakruuk ba sira liu-liu fundadór na’in haat (4) no menbru sira seluk ne’ebé fila ona ba mundu seluk, husu Maromak hara’ik deskansa ho hakmatek,” nia hateten.

Prezidente Konsellu Sentrál RENETIL, Carlos da Silva “Saky”, hateten kongresu ne’e hanesan baibain kada tinan haat RENETIL sempre realiza nia kongresu hodi define programa no planu ho hili estrutura ezekutivu foun no konsellu sentrál nian.

Iha tinan ne’e, RENETIL hili tema kongresu ne’e tanba haree ba realidade ohin loron ne’e iha  buat barak mak seidauk la’o di’ak, hanesan instituisaun Estadu nian barak sei frajil hela no seidauk konsolida metin didi’ak.

“Entaun, hanesan organizasaun apartidariu ida oinsá mak ami atu tulun hametin Estadu ida-ne’e liu-hosi partidu polítiku sira-ne’ebé mak ami-nia membru sira espalla ba. Nune’e mós hanesan organizasaun, ami sempre halo intervensaun kontaktu hanesan Prezidente Repúblika, Primeiru-Ministru, Prezidente Parlamentu Nasionál hodi hato’o preokupasaun sira-ne’ebé povu hasoru hodi resolve, nune’e mós hametin Estadu,” nia hateten.

Tanba, tuir nia, dalaruma partidu polítiku sira barak entaun ida-idak la’o ninian, envez tau hanoin hamutuk atu haree problema sira-ne’ebé povu barak hasoru maibé ida-idak dada tuir nia interrese polítika.

“Loloos ne’e ita partidu barak laiha buat ida, tanba ita-nia sosiedade ida-ne’e plurarista maibé ita bele buka konsensu entendimentu diálogu,” nia dehan.

Entertantu kongresu ne’e hala’o durante loron rua ne’ebé hahú hosi loron 02 to’o -03 dezembru 2022 ne’e, ne’ebé partispa hosi kongresista prevista 600-resin hosi membru RENETIL rejistadu ho totál 2000-resin.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!