iklan

MANATUTO, MUNISÍPIU

PR Horta lansa Sentru KEmON-Báziku Monaco Same

PR Horta lansa Sentru KEmON-Báziku Monaco Same

Prezidente Repúblika, José Ramos Horta, hala'o vizita ba sala Maternidade Monaco Same sai hanesan fasilidade "Kuidadu Emerjénsia Obstetrika no Neonatal-Báziku (KEmON-B), iha Munisípiu Manufahi, sesta (02/12). Imajen Tatoli/Francisco Sony.

MANUFAHI, 02 dezembru 2022 (TATOLI)—Prezidente Repúblika Demokrátika (PR), José Ramos Horta, sesta ne’e, lansa Sentru Kuidadu Emerjénsia Obstétriku no Neonatal-Báziku (KEmON-B) Monaco iha  postu adnibistrativu Same, munisípiu Manufahi hodi fó esperansa ba inan isin-rua ahi sira-ne’ebé iha risku ba mate bainhira atu tuur-ahi (partu).

Notísia Relevante: Formasaun KEmON fasilita Pesoál Saúde salva inan ho bebé 

Fasilidade maternidade refere antes ne’e koñesidu ho naran Maternidade Monaco no antes ne’e konstrui ho apoiu finanseiru hosi Liurai Monaco ‘Sua Alteza Serenísima Prínsipe Alberto III” no inaugura iha fulan abríl 2008.

Sentru refere daudaun ne’e hetan apoiu hosi UNFPA (Fundu Populsaun Nasaun Unidas) Timor-Leste no Governu Austrália ho totál $50.000 hodi halo reabilitasaun edifísiu inklui mós fornesimentu ekipamentu eskritóriu no ekipamentu médiku, hodi tulun inan liu 6.000) ne’ebé presiza atendimentu emerjénsia obstétriku no servisu kuidadu saúde reprodutiva ho kualidade.

Prezidente Repúblika, José Ramos Horta, akompañadu hosi Ministra Saúde, Odete Maria Freitas Belo no Reprezentante UNFA iha Timor-Leste, Pressia Arifin-Cabo, hala’o re-inagurasaun Maternidade Monaco Same ne’ebé sai hanesan fasilidade “Kuidadu Emerjénsia Obstetrika no Neonatal Báziku (KEmON-B), iha munisípiu Manufahi, sesta (02/12). Imajen Tatoli/Francisco Sony.

“Ha’u agradese ba UNFPA no Austrália tanba imi hadi’a uma ne’e. Ha’u sei informa ba Liurai Monaco, nia kontente ita boot sira hadi’a tiha fatin ida-ne’e,” PR Ramos Horta hateten iha Sentru KEmON-Báziku Monaco Same.

Laureadu Prémiu Nobel da Paz ne’e mós apela ba inan isin-rua  sira atu bele hakbesik an ba postu saúde no lebele hein to’o moras boot mak mai ospitál no pessoal saúde sira mós lebele salva inan no oan sira-nia vida.

Aleinde ne’e, ekipamentu médiku ne’ebé apropriadu, fasilidade ida-ne’e mós sei fornese atendimentu hosi fornesedór kuidadu saúde ne’ebé treinadu no kompetente atu identifika inan sira-ne’ebé iha risku aas, molok isin-rua, durante isin-rua no hafoin tuur-ahi (partu).

Sentru KEmON-B Monaco Same dadauk ne’e iha fasilidade hanesan sala ekografia (USG), pos-natál, dapur, eskritóriu, sala ba pesoál saúde, toilet, no iha mós inkubatór ida (1), kama lima (5), kama andar ba pesoál saúde, infant radiant warmer ida (1), mákina ba USG nian inklui pesoal saúde lima (5) ne’ebé treinadu ona ba KEmON-B.

“UNFPA servisu hamutuk ho Governu Timor-Leste no mós parseiru dezenvolvimentu seluk atu halakon mortalidade maternásl no proteje inan ho bebé sira-nia saúde,” Reprezentante UNFPA iha Timor-Leste, Pressia Arifin-Cabo hateten.

Reprezentante ne’e garante UNFPA sei kontinua fornese apoiu tékniku ba Institutu Nasionál Saúde (INS) iha dezenvolvimentu kurríkulu ho pakote informasaun ba Médiku no Parteira sira hodi redús mortalidade inan durante tuur-ahi.

Ministra Saúde, Odete Maria Freitas Belo, iha kompromisu hodi kontinua tau matan ba fasildiade ne’ebé apoiu ona hosi UNFPA no Governu Austrália no bele fasilita inan isin-rua sira iha tempu naruk.

Maske Governu Timor-Leste hadi’a ona prestasaun servisu kuidadu saúde iha nasaun illa ida-ne’e hafoin restaurasaun independénsia, servisu kuidadu saúde sei limitadu, partikularmente ho difikuldade atu kobre área-defisil sira hanesan laletek no foho iha Manufahi no mós nunisípiu seluk ho área jeografiku hanesan.

Evidentemente, falta parteira kualifikadu durante isin-rua no partu sai dezafiu boot ida hodi hatán ba Timor-Leste ninia taxa mortalidade maternál no neonatál ne’ebé aas liu iha rejiaun ida-ne’e.

Jornalista : Cidalia Fátima

Editór        : Cancio Xiemenes

iklan
iklan

Leave a Reply

iklan
error: Content is protected !!