iklan

DESPORTU, DEFEZA, HEADLINE

FC Akademia Hera sai vensedór iha Kopa Navál 2022

FC Akademia Hera sai vensedór iha Kopa Navál 2022

DILI, 03 dezembru 2022 (TATOLI)—Komponente Navál hosi FALINTIL Forsa Defeza Timor-Leste (F-FDTL), realiza Kopa Naval 2022 ne’ebe partisipa hosi ekipa hamutuk 32, tama iha faze finál FC Akademia Hera sai  manán na’in ba Kopa Navál 2022.

FC Akademia Hera sai vensedór ba kopa Naval hafoin jogu hasoru FC FECT UNTL, ne’ebé manán liuhosi penalti ho eskore 4-3, iha Estadiu Munisipál Dili, sábadu ne’e.

Imajen/Arminda Fonseca

Komandante Komponente Navál, Kapitão Mar e Guerra Higino das Neves, hateten objetivu kompontente navál realiza jogu kopa naval ne’e hodi komemora aniversáriu Komponente Naval nian ba da-20 ne’ebé sei realiza iha 12 fulan-janeiru 2023.

“Jogu ne’e ita realiza atu juventude hotu mai hatudu sira-nia talentu ne’ebé sira iha, hakarak aproveita iha eventu ne’e hodi aumenta sira-nia kapasidade tékniku hodi bele mellora ninia jogu iha futuru, no liuhosi jogu ne’e hametin amizade entre jogadór sira”, Higino das Neves, hateten iha nia diskursu iha Estádiu Munisipál Dili.

Tuir nia kopa ne’e importante hosi jogu ne’e mak konesaun no kria amizade hodi koñese malu aumenta relasaun fraternal, servisu hamutuk, besik malu liutan hodi asegura rai ne’e, liuliu atu garante pás no estabilidade iha nasaun ne’e, liuliu iha kapitál Dili.

Iha fatin hanesan, Prezidente Komisaun Organizadora, Kapitaun Tenente Raimundo Soares, hateten, kopa Naval nu’udár meiu ida hodi komemora loron Komponente Naval nian, ne’ebé hala’o dala tolu ona, ho hakarak atu fó opurtunidade ba joven sira atu bele mellora sira-nia kapasidade jogu nomós nu’udár kondisaun ida atu evita problema hodi kontribui ba estabilidade nasionál.

Tasa ba kopa Navál F-FDTL 2022.Imajen/ Arminda Fonseca
Tasa ba kopa Navál F-FDTL 2022.Imajen/ Arminda Fonseca

Kopa Naval tinan ida ne’e partisipa hosi ekipa hamutuk 32 ne’ebé maihosi juventude territóriu laran tomak, hanesan, FC Naval A, FC Naval B, FC São Pedro Berebido, FC Naimeco, FC Kanko, FC Waisa, FC União, FC União Metinaro, FC União Venilale, FC Unbafo, FC Hatuleta, FC Nova Estrela, FC Makikit Foin Sae, FC Subo’Ai, FC Porlamano, FC Zale-Zale, FC Bala Badiu, FC 17 de Abril, FC Ostico, FC Amador, FC Nature, FC UPM, FC São Paulo, FC Kakatua, FC Mota Ulun, FC Academia Hera, FC Uatuli, FC Fota, FC SS Eoncar no FC Sukaer Laran.

Vensedór dahuluk iha Copa ne’e mak FC Akademia Hera, ne’ebé hetan prémiu $2.500 no hetan taxa rorativa iha Kopa Naval 2022 ne’e, vensedór daruak FC FECT UNTL hetan osan $1.300 ho taxa, vensedór datoluk FC Naval $1.000 ho taxa no vesedór dahaat mak FC Naimeco $800 no taxa.

Alende ne’e iha jogu Copa Naval ne’e, iha mellor jogadór ida ho naran Adoniliano Xaviel hosi FC FECT UNTL ne’ebé hetan osan $200, iha mós mellor markadór Hilario Estanislau Ximenes hosi FCFECT UNTL hetan osan $200, inklui mellor baliza Januario Abi hosi FC Naimeco hetan osan $200.

Kopa Naval ne’e rasik hala’o abertura iha loron 03 jullu 2022 no ramata ohin 03 dezembru 2022.
Atividade Copa Naval 2022 ne’e la’o ho susesu tanba hetan apoiu hosi hosi Fderasaun Futeboll Timor-Leste (FFTL), Heineken Timor-Leste, Timor Telecom, Eto no Fakuldade Enjiñeira Siénsia Teknolójia iha Universidade Nasionál Timor Lorosa’e (UNTL) no lideransa komunitária Hera ho nia juventude .

Jornalista : Arminda Fonseca

Editór      : Florencio Miranda Ximenes

iklan
iklan

Leave a Reply

iklan
error: Content is protected !!