Fundasaun Alola loke feira Natal hodi promove identidade kulturál
DILI, 03 dezembru 2022 (TATOLI)— Fundasaun Alola, sábadu ne’e, hahú loke feira Natál hodi konvida grupu artezenatu hosi munisipíu 13 inklui Rejiaun Administrativa Espesiál Oé-cusse Ambeno (RAEOA) hodi faan sira-nia produtu.
Jerente ba Empoderamentu Ekonómiku Feto iha Fundasaun Alola, José Sabino Ximenes, hateten, feira Natal ne’e hanesan polítika Fundasaun Alola nian ne’ebé kada tinan sempre halo, hodi konvida grupu soru tais no artezenatu sira faan sira-nia produtu.
“Ohin, ita loke tan feira ne’e hodi komemera loron boot Natal no Tinan foun, no komemora mós loron 14 dezembru nu’udár loron nasionál ba tais ne’ebé foin lalais hetan aprova hosi Governu”, José Sabino Ximenes, hateten, iha Fundasaun Alola, Quintal-Boot,Dili.
Feira bad ala-17 ne’e, Fundasaun Alola konvida grupu hamutuk 50-resin hodi faan produtu hanesan tais, hahán lokál, artezenatu no seluk tan.
“Ita konvida ita-nia maluk sira ne’e mai promove identidade kultural no hetan rendimentu”, nia hateten.
Feira Natal durante loron rua hahú hosi 3 to’o 4 dezembru ne’e hetan apoiu fundu hosi Embaixada Tailándia hamutuk $2.700.
Iha fatin hanesan, Partisipante feira Natal hosi Hera, Lucia Pecoa hateten, nia parte kontente tanba kada tinan Fundasaun Alola konvida sira faan sira-nia produtu hodi hetan rendimentu atu sustenta família.
Sasan ne’ebé nia faan, mak hanesan tais ne’ebé prodús ba asesores, kelu, brinkus, pasta tais inkui tais feto mane no selenda ki’ik sira.
“Sasan sira ne’e ha’u faan ho folin kiik hahú hosi centavu 0,50 to’o $25”, nia afirma.
Jornalista: Arminda Fonseca
Editór : Florencio Miranda Ximenes
