DILI, 03 dezembru 2022 (TATOLI) – Ministériu Edukasaun Juventude no Desportu Timor-Leste (MEJD) ho Institutu Camões, I.P, sábadu ne’e, asina akordu estensaun ba programa formasaun lian Portugés ba professor timoroan sira ba tinan lima tan.
Biban ne’e, Ministru Edukasaun Juventude no Desportu, Armindo Maia, hateten atividade sentrál ne’ebé nia halo iha nasaun Portugál mak kontinua asina protokolu kooperasaun ho Institutu Camões hodi estende tan programa Pro-Portugeza iha Timor-Leste.
Programa Pro-Portugeza ne’e kona-ba formasaun lian Portugueza ba formadór Timoroan no iha estensaun ne’e mak enkaixa tan komponente seluk mak hanesan konteúdu eskolár ne’ebé sei hatama matéria hanesan Matemátika, fízika no Kímika iha laran.
“Akordu kontinuasaun programa Pro-Portugueza entre governu TL ho Institutu Camões ne’e sei realiza iha 2023-2028. Maibé programa Pro-Portugueza ne’e loos atu hanorin de’it lingua Portugés, maibé sei hatama mós konteúdu eskolár sira hodi bele garante kualidade ida di’ak ba kapasidade formadór timoroan sira nian iha future, atubele kontinua hatutan filafali ba profesór sira seluk,” Ministru Armindo hateten liuhosi konferénsia imprensa iha Aeroportu Nicolau Lobato, Dili.
Governante ne’e mós afirma iha mós akordu seluk maka atu asina tan ho Ministru Edukasaun Portugál kona ba kontinuasaun ka espansaun programa CAFE nian. maibé programa ne’e la konsege asina tanba mosu fallansu tékniku.
“Ha’u ho Ministru Edukasaun Portugál tuir loloos atu asina akordu kona-ba kontinua programa CAFE nian, maibé tanba iha kestaun tékniku entaun ami la konsege asina, maibé ha’u fiar katak bele asina iha tempu oin mai”, nia kompromete.
Fallansu tékniku akontese ne’e tanba laiha liña koordenasaun entre Ministériu Negósiu Estranjeiru no Kooperasaun TL ho Ministériu Edukasaun Portugál.
Jornalista: Tomé Amado
Editór : Florencio Miranda Ximenes
