Uma-kain rua iha Fohorem hetan dezastre naturál
COVALIMA 04 dezembru 2022 (TATOLI) –Dezastre naturál ho tipu rai halai akontese iha bairru Lamak, aldeia Fatubitik, suku Fohorem, postu administrativu Fohorem, rezulta uma-kain rua hetan estragu totál.
Xefi suku Fohorem, Fernando Ferreira informa, akontese dazestre naturál rai halai ne’e afeta komunidade sira-nia uma rua mak grave, nune’e konsege evakua família rua ne’e ba fatin ne’ebé seguru.
“Akontese dezastre naturál ho tipu rai halai iha bairru Lalamak , aldeia Fatubitik, suku Fohorem, postu Fohorem, munisípiu Covalima,” nia informa ba Tatoli iha Covalima, domingu ne’e.
Dezastre naturál iha loron-sabádu, 03 dezembru tinan 2022, afeita uma-kain haat ho xefe família 11.
Hosi númeru ne’e uma-kain rua mak grave tanba uma-laran nakfera nune’e komunidade sira halai sai husi-uma, hodi evakua ba família ne’ebé hela besik.
Hafoin akontesimentu dezastre naturál ne’e, Administradór postu administrativu Fohorem, Carlos Carvalho de Araújo no xefi Suku Fohorem Fernando Ferreira to’o kedas iha fatin, hodi evakua família vítima afetadu ba fatin ne’ebé seguru
“Ha’u rasik informa ona ba autoridade munisípiu ona, maibé seidauk hetan vizita husi munisípiu,” nia hateten.
Iha akontesementu ne’e rezulta uma-kain rua hetan estraga grave no uma seluk hetan ameasa no sai risku atu monu, tanba akontese rai monu.
Jornalista:Celestina Teles
Editor: Evaristo Soares Martins
