DILI, 04 dezembru 2022 (TATOLI)—Eis Prezidénte Repúblika, Kay Rala Xanana Gusmão, partisipa konferénsia Europeia ba apoia no soliedaridade ba povu Sahara Osidental (EUCOCO, sigla ingés) ba dala-46 iha sidade Alemaña nian, Berlin.
Konferénsia ne’e hala’o iha sesta-feira no sábadu, semana ne’e.
Konferénsia ho tema ” ba sahara osidental no auto determinasaun ” partisipa hosi delegasaun nasaun oioin, maioria parte husi nasaun Europeia, inklui konvidadu de honra Kay Rala Xanana Gusmão no delegasaun hosi Parlamentu Timor-Leste nian.
“Hosi Parlamentu Nasionál deputadu Partidu CNRT Adérito Hugo mak xefia delegasaun ne’ebé kompostu husi deputadu husi FRETILIN Agostinho Siqueira Somotxo, KHUNTO reprezenta husi Luis Roberto no Isabel Ximenes hosi Frente Mudansa,” Komunikadu imprensa ne’ebé Agência Tatoli, asesu ohin.
Konferénsia anual ne’e partisipa hosi nasaun ne’ebé rekoñese independénsia Sahara Osidentál, instituisaun nasionál, Europeia, organizasaun polítika, sindikatu traballadór assosiasaun soliedaridade ba povu Sahara Osidentál, sosiedade sivíl, autór jurídiku no kulturál.
Embaixadór Sahara ba Europa, Oubbi Bushraya Al-Bashir hateten, konferénsia ne’e foka liu ba kestaun haat mak hanesan, polítika no informasaun, direitu umanu, rekursu naturál no konsolida estadu Sahara.
Eventu ne’e sai hanesan sasin ba konferénsia Interparlamentar Bundestag iha Parlamentu Alemaña, Europa, Ázia no Amérika Latina nia oin.
Konferénsia ba Apoiu no Soliedaridade Europa ho Sahara (EUCOCO) realiza kada tinan dezde 1975 ka tinan inísiu konflitu iha Sahara no kada tinan hili sidade ida iha Europa ba eventu ne’e.
EUCOCO nu’udar plataforma ida ba reflesaun, análize no koordenasaun ba desizaun ne’ebé klara ne’ebé bele kontribui ba dezenvolvimentu luta povu Sahara, direitu ba auto determinasaun no independénsia ba povu Sahara.
Jornalista : Felicidade Ximenes
Editór: Evaristo Soares Martins
