DILI, 05 dezembru 2022 (TATOLI)– Universidede Katolika Timorense (UCT-sigla Portugés), São João Paulo II Balide Dili konvida Prezidente Repúblika (PR), José Ramos Horta, atu halo inagurasaun ba sira nia biblioteka eskola nian iha tinan oin no aproveita loke mós anuletivu 2023 nian.
“Ami mai hasoru Prezidente Repúblika hodi konvida atubele ba halo abertura ba ami nia ano letivu foun 2023 no inaugura ami nia biblioteka eskola nian iha tinan oin, atividade sei hala’o iha fevereiru ou marsu hanesan ne’e,” dehan Reitór UCT São João Paulo II, Padre, Joel Casimiro Pinto, hafoin hasoru malu ho Prezidente Repúblika iha Palasiu Presidensial Dili, segunda ne’e.
Alende ne’e, UCT hato’o mós agradesementu ba Xefe Estadu tanba antes ne’e oferese ona livru balun ba eskola hodi utiliza ba hanorin estudante sira.
“Ami mai agradese mós ba Prezidente Repúblika partisipa ona iha ami nia Universidade kona-ba formasaun edukasionál nian no oferese mós livru edukasaun nian ne’ebé util tebes ba estudante sira sei utiliza iha sira nia estudu”, nia agardese.
Nune’e, nia afirma PR Horta konfirmadu sei partisipa iha atividade ne’ebé mak sei hala’o iha tinan oin.
“Prezidente konfirma kedan ho ami katak nia sei partisipa iha ami nia atividade rua ne’e”.
UTC hetan lisensa no akreditasaun sai loloos hanesan Universidade hosi Governu iha loron 8 dezembru tinan 2021 liuhusi Ministeriu Ensinu Superior no Siensia Kultura (MESSK).
Hafoin loke anu letivu foun iha 2021, UTC konsege simu kedan estudante hamutuk na’in-540, ba fakuldade hotu-hotu, fakuldade siensia edukasaun, siensia umana, siensia saúde, medisina jeral, Enfarmazen, Enjenaria no agrikula.
Jornalista: Hortencio Sanchez
Editor : Florencio Miranda Ximenes
