COVALIMA, 05 dezembru 2022 (TATOLI)–Departamentu programatiku liuhosi Distric Public Health Officer rejista pasiente moras mentál na’in-25 iha munisípiu Covalima.
“Ita rejista pasiente moras mentál na’in-25 ne’ebé balun ami halo transferénsia ba Laclubar-Manatuto hodi halo tratamentu ne’ebé konsege rekupera ona. Tanba kada fulan, ami mós halo vizita ba pasiénte sira-ne’e,” Distric Publick Health Officer, Afonso Oliveira, hateten ba Agência Tatoli, iha Camanasa, segunda ne’e.
Tuir relatóriu, pesoál saúde sira rejista pasiénte moras mental ema na’in-25 ne’ebé mai hosi sentru saúde hitu ne’ebé balun transfere ba Laclubar no balun halo tratamentu rutina iha Covalima.
“Ami halo tratamentu ba pasiénte moras mentál sira-ne’e mai hosi suku Camanasa ema na’in-ida (1), Suai Loro ema na’in-ida (1), balun hosi postu administrativu Maucatar no Tilomar mai foti ai-moruk,” nia informa.
Maske durante halo atendimentu maibé pesoál saúde sira hasoru difikuldade hanesan estoke ai-moruk ho tipu Amitripilin laiha ona atu distribui ba pasiénte ba moras mentál sira.
Kestaun ne’e, sira-nia parte haruka ona pedidu ba iha nasionál maibé tipu ai-moruk sira-ne’e iha nasionál mós estoke laiha.
Jornalista : Celestina Teles
Editór : Cancio Ximenes
