DILI, 05 dezembru 2022 (TATOLI)—Jerente Empoderamentu Ekonómia Feto iha Fundasaun ALOLA, José Sabino Ximenes, informa iha 2019 to’o 2022 Fundasaun Alola estabelese ona rede soru tais iha munisípiu neen (6) mak hanesan Oé-Cusse, Lospalos, Bobonaro, Covalima, Baucau no Viqueque.
Notísia Relevante: Fundasaun Alola sei estabelese rede soru tais iha Baucau-Viqueque
“Durante ne’e, hosi 2019 to’o 2022, ita estabelese ona rede soru tais iha munsípiu neen (6). Dahuluk, iha 2019 hahú hosi Oé-Cusse (RAEOA) mai Lospalos, nune’e mai 2020 iha COVID-19 ita la estabesele, entaun mai fali 2021 ita estabelese fali iha Bobonaro ho Covalima no agora 2022, ita aumenta tan ba iha Baucau no Viqueque,” José Sabino Ximenes hateten ba Agência Tatoli iha nia kna’ar fatin, Dili, segunda ne’e.
Bainhira Fundasaun Alola estabelese tiha rede soru tais iha munisípiu neen (6), soru-na’in sira hetan kapasitasaun ba kór naturál, líderansa no violénsia bazea ba jéneru no diversifikasaun produtu jestaun negósiu.
“Iha jestaun negósiu ne’e, ami kolabora ho ANZ ne’ebé sira mak fasilita no tópiku ne’e sira bolu “money minded”. Entaun ida-ne’e sira mak fasilita kuaze loron ida ba kada grupu ho matéria ne’ebé simples, hanesan oinsá sira atu jere sira-nia negósiu, kalkula osan tama no sai ida-ne’e mak sira fasilita. Iha ne’ebá, ita mós fasilita kona-ba kór naturál ne’ebé durante ne’e ita fó ba sira, ida-ne’e grupu hotu-hotu ne’ebé ita estabelese ho ninia tópiku hanesan. Tanba ne’e, bazea ba nesesidade hosi grupu sira, maibé barak liu sira husu kona-ba oinsá atu halo kór naturál tanba sira soru-na’in,” nia dehan.
Aliende ne’e, soru-na’in sira balun husu hakarak suku maibé tanba ho tempu ne’ebé limitadu, entaun Fundasaun Alola halo fali diversifika ba produtu sira seluk, hanesan bringku no korrente sira-ne’ebé simples no lalais atu sira bele aprrende ida-ne’e.
“Maibé, sira balun ne’ebé husu atu suku ne’e labele, tanba ita lori tempu loron rua no tolu ne’e la sufisiente ba sira atu apreende,” nia dehan.
Iha rede soru tais ne’e, Fundasaun Alola nia alvu ba kada munisípiu hamutuk 50, hodi kapasita kona-ba soru tais ba soru-na’in sira.
“Ami-nia alvu ne’e kada munisípiu ida ho soru na’in-50, entaun rede soru tais ne’ebé ami estabelese ona iha munisípiu neen (6) ne’e, hamutuk soru na’in-300,” nia dehan.
Oinsá planu atu establese tan rede soru tais ba munisípiu seluk iha 2023, nia hatán, Fundasaun Alola iha planu atu estabelese tan rede soru tais iha munisípiu seluk, maibé proposta ba tinan ida-ne’e hahú 2021 to’o 2023 mak munisípiu rua (2) de’it hanesan Baucau no Viqueque, karik iha oportunidade hetan tan fundu ruma bele espande tan ba munisípu seluk.
“Tanba, daudaun ne’e fonte orsamentu ne’e mai hosi UN Woman mak fornese orsamentu ba estabelese rede ida-ne’e,” nia dehan.
Jornalista : Nelia Fernandes
Editór : Cancio Ximenes
