iklan

NASIONÁL, POLÍTIKA

Jill Jolliffe bele mate maibé espíritu lia-loos sei la mate

Jill Jolliffe bele mate maibé espíritu lia-loos sei la mate

Jornalista Jill Jolliffe hasorui malu ho Komandante Nino Konis Santana. Imajen/Espesiál.

DILI, 05 dezembru 2022 (TATOLI)—Ativista no jornalista nia isin bele mate maibé nia espíritu lutadór ba buka lia-loos sei la mate, hanesan mós asswa’in timoroan sira-nian, Jill Jolliffe nia espiritu sei hamahon Povu Maubere nia jornada ba moris di’ak, tuir dalan loos no sempre buka lia-loos.

Notísia Relevante: Xanana Gusmão triste ho Jill Joliffe nia mate

Jill Jolliffe. Imajen/Espseiál.

“Conselho de Imprensa de Timor-Leste hato’o nia sentidu Kondolénsia kle’an ba Jill Jolliffe nia mate. Jill Jolliffe nia isin mak mate, maibe nia espíritu lutadór ba buka lia-loos sei la mate. Hanesan mós asswa’in timoroan sira-nian, Jill Jolliffe nia espíritu sei hamahon nafatin Povu Maubere nia jornada ba moris di’ak, tuir dalan loos no sempre buka lia-loos,” refere komunikadu imprensa ne’ebé Agência Tatoli asesu, segunda ne’e.

Conselho de Imprensa de Timor-Leste hato’o nia solidariedade ba Jill Jolliffe nia família no belun sira-ne’ebé nia husik hela. 

Conselho de Imprensa (CI) Timor-Leste ho laran susar tebes simu notísia kona-ba jornalista Jill Jolliffe nia mate iha loron 02 fulan-dezembru 2022, tanba Timor-Leste lakon nia belun no defensór di’ak ida.

Nu’udar ativista no jornalista, Jill Jolliffe habelun-an profisionalmente ho kauza Povu Maubere nian, hahú kedas iha períodu invazaun militár Indonézia iha 1975.

Pesoalmente, nia sai belun ba líder polítiku sira, pioneiru movimentu polítiku 1974-75 no iha relasaun pesoál no profisionál ne’ebé lori nia grava hela memória ain-le’ut líder politiku timoroan sira hanesan Francisco Xavier do Amaral, Nicolau Lobato, Borja da Costa, Roque Rodrigues, Vicente Reis Sahe no seluk tán liuhosi nia obra profisionál nu’udar jornalista no hakerek-na’in.

Hosi nia obra mak jerasaun foun sira bele sani hanoin polítiku revolusionáriu liuhosi obra polítika no poétika líder jerasaun 1974 nian.

Mundu jornalizmu lakon advogadu di’ak ida ba jornalizmu krítiku, jornalismo de advocacia ba justa kauza.

Jornalista Jill Jolliffe hosi 1974 to’o loron ne’ebe hetan moras, nia nunka para atu hanoin no hakerek kona-ba Povu Maubere nia istória luta nian.

Ninia hakerek halo istória dezempeñu jornalizmu nian iha Timor-Leste sai istória globál liuhosi filme The Balibo Five, filme ne’ebé bazea ba Jill Jolliffe nia livru ho titulu Cover-Up: The Inside Story of the Balibo Five, istória kona-ba asasinatu Greg Shackleton ho nia kolega na’in-haat (4) hosi kanál televizivu Austrália nian iha Balibo hosi militár Indonézia sira iha 16 outubru 1975.

“Jill Jolliffe, jornalista ida-ne’ebé prova duni verdade hosi afirmasaun ne’ebé hateten katak kaneta nia meik kro’at liu kilat-musan. Advokasia profísionál ba Povu Maubere nia kauza, halo Jill Jolliffe sai inimigu númeru um rejime Soeharto nian. Nia sai fatór determinante ba negosiasaun polítika entre Portugál-Indonézia bainhira diskute kona-ba planu vizita delegasaun Parlamentár Portugál iha outubru 1991. Vizita ne’ebé ikus mai kansela no sai fatór motivadór ida mós ba Manifestasaun Polítika Pasiva Juventude iha 12 novembru 1991,” nota ne’e hateten.

Iha tinan 1994, Jill Jolliffe konsege hasoru malu ho Komandante Nino Konis Santana iha Ermera no bazea ba hasoru malu ne’e to’o ikus nia hakerek livru ho títulu Finding Santana.

Jornalista : Nelia Fernandes 

Editór     : Cancio Ximenes

iklan
iklan

Leave a Reply

iklan
error: Content is protected !!