Membru PN husu Governu loke estrada alternativu ba Viqueque Vila
DILI, 05 dezembru 2022 (TATOLI)—Deputadu hosi bankada Frente Revolsionáriu Independente (FRETILIN), Dario Madeira, husu Governu atu loke estrada alternativu ba iha munisípiu Viqueque Vila relasiona ho ponte Buanurak baliza entre postu adminsitrativu Ossu no Vikeke Vila, ne’ebé kotu iha domingu (27/11) maizumenus tuku 11h20.
Notísia Relavante: MOP Viqueque komunika ona parte nasionál rezolve ponte Baunurak kotu
“Husu Governu liu-liu Ministériu Obra Públika (MOP) bele konsidera pedidu sira mai hosi munisípiu Viqueque hodi loke estrada alternativu hosi Buanurak liuhosi mota sorin ba ponte pires ne’e estrada alternativu la liu mota hodi ema bele asesu nafatin iha minisípiu,” Membru PN ne’e hato’o liu hosi reuniaun plenária iha PN, segunda ne’e.
Dario Madeira hateten, Viqueque presiza tebes intervensaun direta hosi Governu atu loke estrada alternativu ida hodi asesu ba Viqueque Vila tanba Viqueque agora daudaun iha izoladu karreta labele tama bainhira udan tun ne’e ema labele liu ona.
“Ezemplu de’it semana ida liu ba, 28 novembru ponte Buanurak kotu transporte sira tenta atu liu hosi fali Natarbora no mai to’o ne’e, mota lori tiha karreta ida. Ponte kotu nafatin to’o agora la hadi’a, agora mai fali iha 30 novembru karreta fuzu boot ida tula sasán barak komunidade ninian atu faan iha Dili mai tama duni iha mota Buanurak ne’e bee lori no baku fila,” nia hateten.
Nia haktuir, agora karreta bele liu tanba la udan mota la tun maibé bainhira mota tun ema labele asesu ba Viqueque vila no pior liu funsionáriu públiku barak iha postu Ossu dadeersan atu tun ba serbisu iha Viqueque Vila bele impede sira-nia servisu.
“Se ita hein agora daudaun halo konstrusaun ba ponte ne’ebé kotu atu ho lalais, labele garante ida-ne’e tanba ezekusaun konstrusaun bele la’o to’o fulan lima ka neen, ida-ne’e sei kle’ur nune’e presiza dalan alternativu,” nia sujere.
Enkuantu, Deputada KHUNTO, Irene Gonzaga, preokupa ponte Lamara iha munisípiu Manatuto ne’ebé ameasa kotu, tan ne’e husu parte ezekutivu presiza atensaun tanba difikuldade movimentu komunidade iha tempu udan.
Hatán ba ponte Buanurak, Ministru Asuntu Parlamentár no Komunikasaun Sosiál (MAPKOMS), Francisco Jeronimo, informa katak semana kotuk reuniaun Konsellu Ministru (KM) orienta ona ministéiru tutela atu hola intervensaun hodi solusiona.
Jornalista : Nelson de Sousa
Editór : Cancio Ximenes
