iklan

DILI, POLÍTIKA

MOP-IGE, I.P atualiza serbisu ba PR

MOP-IGE, I.P atualiza serbisu ba PR

Ministru Obra Públika, Abel Pires da Silva hamutuk ho Prezidente Konsellu Administrasaun IGE, I.P, Ermenegilda da Costa Laurentina Iha Palásiu Prezidente Nicolau Lobato, Bairru Pité, Dili, segunda (05/12). Imajen Tatoli /Egas Cristovão

DILI, 05 dezembru 2022 (TATOLI)—Prezidente Repúblika (PR), José Ramos Horta, segunda ne’e, bolu Ministru Obra Publika (MOP), Abel Pires, ho Prezidente Institutu Jestaun Ekipamentu (IGE) Institutu Públiku (IGE, I.P, sigla portugés), Ermenegilda da Costa Laurentina, hodi rona  serbisu no orienta  instituisaun rua ne’e atu bele tau atensaun atendimentu povu iha baze.

“Agradese ba Prezidente Repúblika nia atensaun MOP no IGE, I.P ninia serbisu, no ohin mai atualiza serbisu  ne’ebé durante la’o no dezáfiu ne’ebé enfrenta,” Ministru Obra Publika (MOP), Abel Pires, hateten ba jornalista sira hafoin ramata enkontru ho Xefe Estadu iha Palásiu PrezidensiálNicolau Lobato, Bairru Pite.

Agradese ba PR tanba promulga ona dekretu-lei ne’ebé halo alterasaun ba ministériu nia estatutu no mós kompeténsia sira IGE, I.P nian.

Hahú iha loron 25 novembru 2022, IGE, I.P iha ona kapasidade foun tuir lei halo mós intervensaun ba estrada no irrigasaun sira-ne’ebé hetan estragu.

“Xefe Estadu nia apoiu bele buka dalan ko’alia ho parseiru sira bele apoiu liután hadi’a kondisaun servisu MOP no IGE, I.P nian,” nia dehan.

Prezidente IGE, I.P, Ermenegilda da Costa Laurentina, hato’o agradesimentu ba PR tanba bele konvida no hala’o sorumutu hodi relata atividade servisu durante ne’e hala’o, no asuntu seluk  ne’ebé ko’alia ho PR kona-ba mota Laclo nian ho dalan Kameda.

“Xefe Estadu mós bolu direta ami fó orientasaun no agora faze melloramentu hosi parte IGE, I.P  nian kontinua loke luan tan estrada kuaze killometru 4,2 ne’ebé agora la’o hela no ami espera tinan 2023, iha fulan-janeiru bele finaliza no ita-nia komunidade iha parte ne’eba bele uza,” nia hateten.

Iha tempu badak, parte IGE, I.P sei kontinua normaliza mota Laclo ne’ebé hamosu inundasaun iha 4 abríl 2021, maibe iha preokupasaun balun entre komunidade ho autoridade entaun sei iha hela faze negosiasaun.

“Depois ha’u fila hosi iha ne’e sei orienta ekipa, aban bele kontinua halo servisu iha mota Laclo,” bia promete.

Mezmu ho kondisaun IGE, I.P iha mákina pezadu unidade 127 maibé iha 93 mak kondisaun di’ak, 17 prosesu manutensaun no 23 kondisaun aat totál.

Nune’e, unidade 93 fahe ba kada munisípiu hotu no ho kondisaun refere entaun pedidu ne’ebé hosi komunidade, IGE, I.P ne’e seidauk bele finaliza no balun finaliza ona maibé kompromete  sei kontinua apoiu komunidade tuir pedidu ne’ebé iha.

“Agora udan monu rai,  ita haree liu ba emerjénsia no mota sira-ne’ebé afeta ba ita-nia komunidade, IGE, I.P sei manetin apoiu,” nia dehan.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!