iklan

DILI, POLÍTIKA

PN adia eleisaun ba kandidatu provedór PDHJ

PN adia eleisaun ba kandidatu provedór PDHJ

Prezidente Parlamentu Nasionál (PNN), Aniceto Longuinhos Guterres Lopes. Imajen Tatoli/Francisco Sony

DILI, 05 dezembru 2022 (TATOLI)—Prezidente Parlamentu Nasionál, Aniceto Longuinhos Guterres Lopes, hateten PN adia eleisaun ba kandidatu provedór ba Provedoria Direitu Umanu no Justisa (PDHJ, siglá portugés) ba mandatu foun tinan haat ne’e iha 19 dezembru.

“Meza adia no propoen ajenda ne’e halo iha loron 19 dezembru, ita tenke realiza eleisaun provedór PDHJ, nune’e iha 23 dezembru bele halo ona tomada pose,” Prezidente PN ne’e hateten iha reuniaun plenária PN, segunda ne’e.

Loloos reuniaun plenária segunda ne’e, PN iha ajenda periódu orden do dia atu realiza eleisaun ba kandidatu provedór PDHJ nian ba mandatu tinan haat tanba Provedora PDHJ atuál, Jesuina Maria Ferreira Gomes, nia mandatu besik termina ona.

Entertantu, tanba iha tersa (06 dezembru 2022) aban no semana tuir mai mós sei laiha reuniaun plenária atu fó biban ba komisaun eventuál ne’ebé trata serbisu ba revizaun pakote lei tolu (3) hosi PN rasik, nune’e sei fó prioridade uluk.

Mezmu nune’e, prosesu adia ne’e labele liu tinan 2022 tanba tenke realiza antes tama ba loron feriadu natal nian, nune’e bankada parlamentár hotu submete ba desizaun refere.

Kona-ba kandidatu na’in hira mak bankada parlamentár sira aprezenta atu kompete iha eleisaun meza seidauk fó sai.

Tuir Konstituisaun Repúblika Demokrátika Timor-Leste (KRDTL) iha artigu 27 (Provedór Direitu Umanu no Justisa ninian), iha  alínea 1 hateten, Provedór Direitu Umanu no Justisa nian, nu’udar órgaun independente ida-ne’ebé iha knaar atu haree no buka hatán sidadaun sira-nia problema hasoru podér públiku, hodi haree loloos hahalok sira-ne’e tuir duni lei no halo prevensaun no hahú prosesu tomak hodi haburas fali justisa.

Alínea 2 haktuir, sidadaun sira bele hato’o sira-nia keisa ba Provedór Direitu Umanu no Justisa nian kona-ba podér públiku sira-nia hahalok ka omisaun, biar laiha kbiit atu hakotu lia maibé nia bele hato’o lia-menon ba órgaun kompetente sira.

Nune’e mós, iha alínea 3 hateten maiória absoluta hosi Parlamentu Nasionál mak hili Provedór Direitu Umanu no Justisa nian atu hala’o kna’ar iha tinan haat nia laran.

Alínea 4 dehan, kna’ar Provedór Direitu Umanu no Justisa ninian ne’e independente hosi “meiu kbiit administrativu no jurisdisionál nian” ne’ebé hakerek nanis iha lei inan no lei oan sira.

Iha alínea 5 haktuir, órgaun sira no ema administrasaun ninian iha obrigasaun atu kolabora ho Provedór Direitu Umanu no Justisa nian.

Jornalista :  Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!