iklan

NASIONÁL, EKONOMIA, HEADLINE, POLÍTIKA

Prezidente Repúblika husu ajusta buat balun iha saláriu désimu terseiru

Prezidente Repúblika husu ajusta buat balun iha saláriu désimu terseiru

Ministru Finansa, Rui Augusto Gomes. Imajen Tatoli/Francisco Sony

DILI, 05 dezembru 2022 (TATOLI)Ministru Finansa, Rui Augusto Gomes, klarifika, relasiona ho saláriu désimu terseiru, Governu haruka ona proposta ba Prezidente Repúblika, José Ramos Horta, iha loron 17 novembru 2022, ne’ebé proposta ne’e kada tinan sempre hanesan, nune’e iha tinan 2019 to’o 2021 mai hanesan de’it.

“Gabinete Prezidénsia Repúblika husu atu halo ajustamentu balun, tanba ne’e iha sesta (01/12), Konsellu Ministru (KM) ko’alia kona-ba kontratadu termu sertu, enkuantu restu parese permanese. Ha’u hanoin kestaun ida-ne’e di’ak liu ba husu diretamente ba iha Gabinete Prezidente Repúblika tanba proposta orijinál ami haruka ona iha loron 17 novembru. Tanba Ministru Finansa laiha kompeténsia atu hatán ein nome órgaun soberanu seluk,” Ministru Rui Gomes, hateten, hafoin reuniaun semanál ho Primeiru-Ministru, Taur Matan Ruak, iha Palásiu Governu, segunda ne’e.

Notísi relevante: Governu aprova pagamentu estraordináriu saláriu adisionál ba ajente administrasaun públika

Nia dehan, proposta ne’e submete ona ba Prezidente Repúblika hodi promulga ka veta, depende desizaun.

“Bainhira Prezidente Repúblika la promulga, signifika ita laiha désimu terseiru, ita hotu laiha,” nia akresenta.

Antes ne’e, Governu liuhosi reuniaun KM estraordinária, iha sesta, aprova ona alterasaun ba diploma ne’ebé aprova iha reuniaun loron 09 novembru 2022, kona-ba pagamentu estraordinária ba saláriu adisionál fulan ida nian.

Ho alterasaun ne’ebé aprova, funsionáriu no ajente administrasaun públika ka ho kontratu administrasaun provimentu inklui traballadór administrasaun públika kontratadu termu sertu ho saláriu kiik hosi $500 no ne’ebé la presta atividade profisionál iha gabinete ministeriál sira sei iha direitu ba pagamentu.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!