DILI, 06 dezembru 2022 (TATOLI)—Governu liuhosi Autoridade Munisípiu Díli (AMD), finaliza ona pagamentu programa Mão de Obra Postu Administrativu (PMOPA) faze daruak ba postu administrativu, Cristo Rei, Dom Aleixo, Nain Feto, Vera Crúz no Metinaro.
“Programa PMOPA faze daruak nian, ami finaliza ona pagamentu ba postu administrativu lima (5) ho pesoál hamutuk 5.025,” Funsionáriu Kontabilidade iha Dirasaun Finansas Munisípiu Dili, Josefa de Carvalho, hateten ba Agência Tatoli, iha nia kna’ar fatin, Dili, tersa ne’e.
Pesoál ne’ebé durante ne’e servisu ba PMOPA iha postu administrativu lima ne’e ema totál hamutuk 5.025 ne’ebé hosi Vera Crúz 960, Cristo Rei 2040, Metinaro 285, Dom Aleixo 980 no Nain Feto 760.
“Prosesu pagamentu ba postu administrativu lima ne’e finaliza ona ho orsamentu hamutuk $57.270,66,” nia esplika.
Iha prosesu pagamentu, postu administrativu sira haruka pedidu mai Autoridade Munisípiu Dili, nune’e haruka ba Prezidente Munisípiu Dili, Guihermina Filomena hatún fali mai xefe pagamentu prosesu depois ba Adjuntu Autoridade Munisípiu Dili, Antonio Móniz Clau, hafoin ba fali prezidente, nune’e finaliza iha Diretora Finansa Munisípiu Dili.
“Prosesu ne’e finaliza tiha mak sira (admiistradór postu administrativu) ba foti iha BNCTL,” nia hateten.
Hafoin finaliza pagamentu ba traballadór sira, postu administrativu sira submete relatóriu ba Munisípiu Dili hodi konfirma.
“Agora daudaun postu administrativu Cristo Rei nia relatóriu mak mai ona, ami seidauk haree no postu haat seluk nia relatóriu seidauk mai. Nune’e, bainhira sira-nia relatóriu mai, ami sei haree hotu maibé fiskalizasaun tun ba haree no monitoriza ona kuandu relatóriu ami check hotu la loos, ami kontaktu ba postu sira hodi mai haree no kuandu loos, ne’e loos ona,” nia dehan.
Kona-ba programa PMOPA ba faze datoluk, nia dehan, iha prosesu ba faze datoluk sira-nia parte seidauk iha informasaun kona-ba asuntu refere.
Jornalista : Nelia Fernandes
Editór : Cancio Ximenes
