iklan

EDUKASAUN, HEADLINE

Estudante na’in-25 hosi ensinu pre-eskolár BCA simu graduasaun 

Estudante na’in-25 hosi ensinu pre-eskolár BCA simu graduasaun 

Estudante Fiel de Jesus Pinto hosi pre-eskolár Bemmalaia Cordiosa de Arcanjo simu graduasaun hosi Diretór Cosme dos Santos Freitas. Imajen/Arminda Fonseca.

DILI, 06 dezembru 2022 (TATOLI)— Ensinu Pre-eskolár Bemmalaia Cordiosa de Arcanjo (BCA), tersa ne’e, hala’o serimónia graduasaun da-haat ba estudante na’in- 25.

Biban ne’e, Diretora Pre-eskolár Bemmalaia Cardiosa de Arcanjo, Santa Madalena de Canossa Dili, Madre Lídia Gomes FDCC, hateten edukasaun mak sai xave ba dezenvolvimentu nasaun nian, nune’e agradese ba inan-aman sira, ne’ebé fó fiar ba eskola BCA hodi hanorin imi-nia oan sira no ohin loron bele gradua, ida ne’e nu’udar dala pozitivu ba labarik sira iha futuru

“Edukasaun ne’e hahú hosi ki’ik to’o boot, nune’e pre-eskolár ne’e importante ba labarik sira, tanba hosi ne’e mak loke dalan matenek nian ba sira, nune’e husu nafatin inan-aman atu tau importánsia ba oan-sira nia futuru”, hateten Madre Lídia Gomes FDCC, ba Agência Tatoli, iha eskola BCA Manleuana, Dili.

Estudante na’in 25 hosi ensinu pre-eskolár Bemmalaia Cordiosa de Arcanjo simu graduasaun, Imajen Tatoli/Arminda Fonseca

Tuir nia, oan atu sai matenek la’ós de’it manorin sira-nia responsabilidade, maibé kolaborasaun entre inan-aman ne’ebé hahú hanorin hosi família ka uma laran.

Iha fatin hanesan, Diretór Edukasaun Munisípiu Dili, Carlito da Silva, hateten nia parte agradese ba eskola BCA, bele fó ona gradua ba estudante 25, tanba ko’alia kona-ba matenek estudante agora mak sai fini ba nasaun Timor-Leste nian.

“Ha’u hatene eskola BCA ne’e rasik, durante ne’e la hetan merenda eskolár, maibé tinan ne’e orsamentu aprova ona no tinan oin sei hetan merenda eskolár, ba difikuldade sira seluk ne’ebé eskola ne’e iha, parte Governu sei hamutuk buka dalan, maibé imporatnte mak eskola ne’e rasik tenke, kontinua no la’o tuir kuríkulu ne’ebé iha maske eskola ne’e privadu,” nia hateten.

Reprezentante Autoridade lokál, Delegada Aldeia Laulora, suku Manleuana, postu administrativu Dom-Aleixo, munisípiu, Dili, Joana Pereira, hateten nu’udar delegada agradese bá Ministériu Edukasaun tanba bele apoiu loke eskola BCA ne’e iha komunidade nia klaran.

“Eskola ida ne’e ajuda tebes ami ami-nia oan bele eskola besik uma, maski iha difikuldade balun ne’ebé eskola hasoru durante tinan haat, maibé ho aprendizajen la’o di’ak hanesan eskola sira seluk”, nia dehan.

Nune’e mós, Fundadór no hanesan Diretór ba ensinu Pre-eskolár BCA, Cosme dos Santos Freitas, agradese ba parte hotu nia kontribuisaun, nune’e ohin loron estudante sira bele gradua ho susesu.

“Ha’u agradese mós ba Governu tanba eskola BCA rasik harii tinan haat ona la hetan merenda eskolár, maibé tinan oin Governu bele tau ona orsamentu ba merenda eskolár ha’u-nia eskola ida ne’e mós bele hetan hotu”, katak nia.

Eskola BCA rasik harii iha tinan 2019 to’o agora halo ona graduasaun da-haat ona ho total estudante kauze 103, no totál manorin hamutuk na’in-neen inklui Diretór Pre-eskolár.

Pre-eskolár ne’e mós hanorin estudante sira tuir kurikulu no kontinua hanorin lian inglés ho objetivu hakarak labarik sira tenke komprende no hatene lian inlgés.

Jornalista : Arminda Fonseca

Editór         : Florencio Miranda Ximenes

iklan
iklan

Leave a Reply

iklan
error: Content is protected !!