DILI, 06 dezembru 2022 (TATOLI) – Estudante rejime espesiál hamutuk na’in 3.000 resin iha territóriu nasionál inklui Rejiaun Administrativu Espesiál Oekusi Ambenu (RAEOA) no munisípiu Atauro ne’ebé atu tama ba Universidade Nasionál Timor Lorosa’e (UNTL) konklui ona ezame iha kada munisípiu.
Prezidente Komisaun Asesu Engeresu Ensinu Superiór (KAEES), Maria Filomena Lay Guterres, relata totál dadus estudante rejime espesiál hosi territóriu nasionál ne’ebé rejista ona atu tuir ezame asesu ba UNTL hamutuk 3.800-resin maibé hosi dadus ne’e kuaze estudante hamutuk 50-resin maka konsidera la partisipa iha ezame taba hasoru difikuldade balun.
“Ha’u hakarak dehan de’it katak sira-ne’ebé tuir ona ezame ne’e loos ona maibé sei iha mós prosesu korresaun sei hala’o tuir prosesu ida-ne’ebé dedikadu no di’ak tebes tanba ita iha mákina korresaun ida transparente,” Maria Filomena hato’o kestaun ne’e ba jornalista sira iha salaun MNEK, Praia dos Coqueiros, tersa ne’e.
Nia akresenta, sé tinan ida ne’e maka proposta UNTL nian husu estudante rejime jerál hamutuk na’in-3.860 entaun KAEES sei prevee 70% ba rejime espesiál.
Portantu prosesu asesu engresu estudante foun ba rejime espesiál atu asesu ba UNTL ninia ezame hahú hosi loron 30 fulan-novembru to’o 02 dezembru. Sira-ne’ebé tuir ezame ne’e tenke idade tinan 23ma timoroan ne’ebé eskola iha rai li’ur, gradua iha tinan haat ba kotuk, rejime espesiál ne’e tama mós ba família kbiit laek inklui veteranu no vítima sira nian oan, rejime espesiál ne’e hamutuk 16.
Hosi rejime espesiál ne’e rasik mós fó oportunidade ba Polísia no F-FDTL, desportiva alta kualidade no diplomata sira sei la tuir teste tanba sira ne’e mai ho rekomendasaun instituisaun ida-idak nian.
Ho nune’e ba rejime jerál ne’e rasik, KAEES halo ona enkontru ho diretór edukasaun munisipál sira bazea ba akordu ne’ebé halo ona iha 2019 katak tinan ida ne’e prosesu inskrisaun ba rejime jerál sei realiza bainhira estudante sira simu ona rezultadu ezame nasionál ne’ebé sei anunsia iha loron 09 dezembru.
Atu nune’e bainhira sira hakarak asesu ba UNTL hodi hili departamentu ruma bele sukat ho sira-nia kapasidade.
Jornalista: Tome Amado
Editór: Evaristo Soares Martins
