iklan

NASIONÁL, HEADLINE, POLÍTIKA

Hametin produsaun dadus violénsia bazeia ba jéneru, UNFPA-DGE realiza semináriu

Hametin produsaun dadus violénsia bazeia ba jéneru, UNFPA-DGE realiza semináriu

Partisipante sira hasai foto hamutuk iha ámbitu semináriu nasionál kona-ba hametin produsaun dadus violénsia bazeia ba jenéru, ne’ebé realiza iha salaun Otél Novu Turizmu, tersa (06/12). Imajen Tatoli/Antónia Gusmão

DILI, 06 dezembru 2022 (TATOLI)– Fundu Nasaun Unida ba Populasaun (UNFPA, sigla inglés), hamutuk ho Diresaun Jerál Estatístika (DGE, sigla potugés), Ministériu Finansa, tersa ne’e realiza semináriu nasionál ida hodi hametin produsaun dadus kona-ba violénsia bazeia ba jéneru iha Timor-Leste.

Diretór Jerál Estatístika, Elias Ferreira dos Santos, DGE servisu hamutuk ho UNFPA hala’o semináriu ida liga liubá violénsia bazeia ba jéneru.

“Hakarak informa katak, ami-nia serbisu hamutuk ida ne’e dezde tinan 2019, tinan tolu liubá realiza treinamentu iha munisípiu haat hanesan Viqueque, Ermera, Dili no Bobonaro, iha formatu treinamentu tolu hanesan fó sai rezultadu violénsia bazeia ba jéneru, depois uza dadus ne’e halo analiza no ikus liu mak autoridade sira husu atu fó treinamentu ba diretór munisipál sira”, Elias Ferreira dos Santos, hateten, iha salaun Otél Novu Turizmu, Lecidere.

Ho ida ne’e, semináriu ne’e sei fó importánsia ba administrasaun dadus no reforsa kolesaun no analiza dadus. Nomós, dalan posível ida atu estabelese sistema dadus GBV nasionál hodi kolabora hamutuk ho institusaun importante sira.

“Dadus n’ebé ita temi ne’e peskiza demografia saúde tinan 2016, Diresaun Jerál Estatístika hala’o peskiza kada tinan tolu. Iha semináriu ne’e ami mós sei husu partisipante sira-nia sujestaun no rekomendasaun atu nune’e bele melloria liután, tanba liuhosi peskiza demografia nian mak ita foin bele hatene violénsia ne’e tanba pergunta barak liga ba área ne’e”, nia afirma.

Biban hanesan, Reprezentante UNFPA iha Timor-Leste, Pressia Arifin Cabo, hateten, violénsia hasoru feto no labarik feto sai nu’udar kestaun boot ida. Globalmente, ida ne’e afeta feto ida hosi ema na’in tolu iha mundu.

“Iha ita-nia nasaun, persepsaun ba violénsia domestika sei tolera iha komunidade no konsidera nu’udar kestaun privadu, liu 70% hosi mane no feto hatete katak halo violasaun doméstika ba nia feen ne’e justikável bazeia ba Estudu Saúde Demográfiku (DHS, sigla inglés) 2016”, Reprezentante UNFPA ne’e salienta.

Maibé, Reprezentante ne’e dehan, la ho dadus, sei la hatene eskala hosi impaktu violénsia hosi feto no mane sira-nia moris iha ita-nia nasaun.

“Agradese ba dadus, tanba agora ita bele hatene katak iha duni impaktu ba feto no labarik feto ne’ebé hela iha dimensaun oioin. Ita mós hatene katak, aleinde ne’e, impaktu boot mós ba moris feto ho difisiénsia, iha área remota ho forma pozisaun vulnerável nian. Ezemplu, bazeia ba analiza sekundáriu hosi DHS 2016, feto esperiénsia violénsia fíziku no seksuál ne’ebé aas bainhira nia la’en lanu. Violensia ne’ebé relata katak dala barak 78% husi mane ne’ebé mak lanu enkuantu 30% husi mane ne’ebé la hemu alkohol”, nia aprezenta.

Nune’e mós, feto ne’ebé esperiénsia violénsia fízika no seksuál mínimu tebes uza antikonsepsionál kompara ho feto sira ne’ebé uza antikonsepsionál.

“Dadus fornese mai ita evidénsia ne’ebé reál kona-ba magnitude problema nian. Ita presiza komprensaun ne’ebé dia’k kona-ba bainhira violénsia doméstika mosu, hosi se, dala-ruma, dala barak no tanbasá. Kolesaun dadus la’ós de’it kestaun tékniku. Kolesaun dadus bele hasa’e evidénsia ho baze programa no polítika. Restreamentu dadus bele mós apoia dezeñu no implementasaun programa atu evalua di’ak liután impaktu hosi programa”, nia espera.

Antikonsepsionál ne’e katak métodu ka produtu ne’ebé posilibilita atu labele mosu fekundasaun ka fertilizasaun entre zigotu no óvulu iha relasaun entre órgaun jenitál maskulina no feminina iha ováriu.

Semináriu ne’e partisipa hosi Prezidente Autoridade, Administradór munisípiu, diretór liña ministériu no Polísia Nasionál Timor-Leste ne’ebé haree ba violénsia bazeia ba jéneru, eventu ne’e hala’o durante loron ida.

Jornalista       : Antónia Gusmão

Editór             : Rafael Ximenes de A. Belo

iklan
iklan

Leave a Reply

iklan
error: Content is protected !!