iklan

MUNISÍPIU, SAÚDE, VIQUEQUE

Janeiru-dezembru 2022, bebe 175 moris iha Sentru Saúde Uatulari

Janeiru-dezembru 2022, bebe 175 moris iha Sentru Saúde Uatulari

Responsabel sala maternidade Sentru Saúde Uatulari, hatudu kama partu ne'ebé aat. Foto Tatoli/Vitorino Lopes da Costa

VIQUEQUE, 06 dezembru 2022 (TATOLI)— Responsabel parteira iha Sentru Saúde Postu Uatulari, Munisípiu Viqueque, Felismina do Rosário, hateten, hosi janeiru to’o dezembru 2022 iha bebe 175 mak moris iha   sala maternidade, Sentru Saúde Uatulari.

“Hosi inisiu fulan janeiru to’o dezembru 2022 ne’e ami konsege fó partu ba inan isin-rua no bebe  hamutuk 175 mak moris iha sentru saúde ne’e “, Felismina do Rosário, hateten ba jornalista sira, iha Sentru Saúde Uatulari, tersa ne’e.

Felismina hatutan, bebe ne’ebé moris iha Sentru Saúde Uatulari hamutuk 175 kompostu hosi  feto 82 no mane 93 no transfere ba sala  internamentu Viqueque na’in lima.

“Inan na’in lima maka ami labele halo atendementu nune’e ami transfere ba Internamentu Viqueque tanba   menus fasilidade hodi fó atendementu ba ita-nia inan isin rua ne’ebé mai ne’e. Maibe,  ida-ne’ebé partu normál mak ami atende,” nia subliña.

Kona-ba atendementu inan isin rua iha Sentru Saúde Uatulari, nia dehan, bainhira inan isin rua mak sente kazu entaun partera, enfermeira no mediku maka akompaña hodi ajuda fó partu.

“Ami sente mak iha kazu ruma,  ami bolu mediku no enfermeira sira mai hodi akompaña ajuda partu hodi tau soru, fó ai-moruk antibiotik. Depois doutora halo karta  rujukan ba internamentu Viqueque,” nia realsa.

Dezafiu ne’ebé sala maternidade hasoru, nia dehan, menus ai-moruk salep hodi kose ba bebe ninia matan no ai-moruk fitka.

“Difikuldade seluk ne’ebé ami enfreta maka ahi eletrisidade ne’ebé mate lakan bainhira inan isin rua sira mai partu iha tempu kalan. Ami sente triste tanba ami uza lampra no lampra telemovel maka leno ba inan isin rua sira. Maibé ho pasiénsia hodi ajuda inan isin rua hodi partu. Tanba ne’e ami hakarak husu Eletrisidade de Timor Leste, empreza públiku (EDTL,E.P) hodi kontrola ahi eletrisidade atu labele mate lakan tanba difikulta ba serbisu atendementu komunidade sira iha sentru saúde ne’e,” nia sujere.

Nune’e mós nia dehan, Sentru Saúde Uatulari iha parteira na’in rua maka fó atendementu ba inan isin rua.

Kona-ba fasilidade nia aprezenta, sala maternidade iha sentru saúde sala konsulta ida no fatin partu ida, maibé kama partu iha  rua deit. Maibe husi kama rua ne’e, ida firuzen hotu ona.

Jornalista : Vitorino Lopes da Costa

Editóra       : Armandina Moniz

iklan
iklan

Leave a Reply

iklan
error: Content is protected !!