VIQUEQUE, 06 VIQUEQUE 2022 (TATOLI)— Ministériu Administrasaun Estatal (MAE), tersa ne’e, estabelese pontu vokal Gender Equality, Disability Social Inclusion (GEDSI-sigla englés) iha munisípiu Viqueque hodi tau matan ba feto no ema ho difisiensia.
Reprezenta Diretór Jerál MAE, Julia da Costa, hateten objetivu establesementu pontu vokal GEDSI importante tanba ba futuru munisípiu ne’e iha ona koñesementu hodi promove feto no ema ho difisiénsia hodi inklina an iha servisu hotu.
Kona-ba kordenasaun ba estabelesimentu GEDSI iha Munisipiu Viqueque lao bazeia ba dekretu Lei nú.3/2016 konaba orsamentu sensivel ba Jeneru (OSJ) liu husi Estatuto Administrasaun Munisipiu ba Autoridade Munisipal iha kada munisipius.
Nia dehan objetivu hodi estabelesimentu Pontu Vokal atu fó apoiu ba dirijente sira iha Munisipiu Viqueque hodi halo planu no implementasaun programa sira nebe sensivel ba Jeneru nomos atu implementa no halo estratejia abordajen integradu Jeneru ho efetivu no efikasia liutan.
“Estabelesementu pontu vokal ne’e importante tebes tanba ba futuru munisípiu iha ona koñesementu ne’ebé klean, oinsa ita promove feto no ema difisiénsia sira hodi envolve ba serbisu sira iha munisípiu”, Julia da Costa hateten ba jornalista sira, iha salaun Adiministrasaun, tersa ne’e.
Nia hatutan moto VIII governu nian maka labele husik ema ida iha kotuk maibe tenke haree ema hanesan, tan ne’e maka MAE establese pontu vokal sira iha munisípiu hotu.
Nia akresenta, iha establesementu pontu vokál ekipa MAE no reprezenta Sekretáriu Estadu Igualidade no Inkluzasaun (SEII) iha Viqueque fó uluk materia kona-ba knar iha pontu vokál no diskusaun ba planu asaun 2023.
“Ami ohin fó uluk materia kona-ba knar no responsavel pontu vokal no kria diskusaun planu asaun 2023 ba munisípiu Viqieque”, nia dehan.
Iha fatin hanesan Administradór Munisípiu Viqueque, Januario Soares ‘Bolly’, dehan dala barak koalia igulidade jeneiru, maibé ladun iha atensaun tamba ne’e MAE foku ba asuntu ida-ne’e.
“Liu hosi establesementu GEDSI ida-ne’e ita bele tau importansia ba asuntu igulidade jeneru iha diresaun sira ne’ebé existe iha munisípiu Viqueque. Establesementu ida-ne’e ita bele hatene ita ida-idak ninia kanar no papel”, nia hato’o.
Kandidata ba pontu vokal GEDSI ne’e delega hosi funsionáriu kada diresaun ida ema na’in rua hodi asumi knar iha GEDSI.
Jornalista : Vitorino Lopes da Costa
Editóra : Armandina Moniz
